ޓްރެފިކް ޖޫރިމަނާގެ އަދަދު 5،000 ރުފިޔާއަށް ވުރެ ބޮޑުވެއްޖެ ނަމަ، އެއްގަމު އުޅަނދު ދުއްވުމުގެ ލައިސަންސް ހިފެހެއްޓުމާއި ބާތިލުކުރުމުގެ ބާރު ފުލުހުންނަށް ލިބޭ ގޮތަށް އެއްގަމު ދަތުރުފަތުރުގެ ގާނޫނަށް ގެނެސްފައިވާ އިސްލާހަށް އަމަލުކުރަން ފަށައިފިއެވެ.

އާ ގާނޫނުގައިވާ ގޮތުން ލައިސަންސް ދޫކޮށްފައިވާ ފަރާތްތަކުން ގާނޫނާއި ގަވާއިދުތަކާ ޚިލާފު އަމަލެއް ކުރުމާއި، ގާނޫނުގައި ބަޔާންކުރާ ޝަރުތު އުނިވެއްޖެކަމަށް އެކަށީގެންވާ ސަބަބުތަކާ އެކު ގަބޫލުކުރެވޭ ހާލަތްތަކުގައި ލައިސަންސް ހިފެހެއްޓޭނެއެވެ.

Ad by Hajj Corporation

ނުދައްކާ ހުރި ފީ އާއި ޖޫރިމަނާ ފައިސާގެ އަދަދު 5،000 ރުފިޔާ ނުވަތަ އެއަށް ވުރެ ބޮޑުވުމުން ވެސް ލައިސަންސް ހިފެހެއްޓޭނެއެވެ. ލައިސަންސް ހިފެހެއްޓޭނީ ޓްރެފިކް ފުލުހުން ކަނޑައެޅުމުން ނުވަތަ ކޯޓު އަމުރަކުންނެވެ.

ވަގުތީ ގޮތުން ލައިސަންސް ހިފަހައްޓައިފި ނަމަ، ލައިސަންސްގެ ބަދަލުގައި 48 ގަޑިއިރަށް ދުއްވުމުގެ ވަގުތީ ހުއްދައެއް ދޫކުރާނެއެވެ.

ލައިސަންސް ނެތި ދުއްވައިފި ނަމަ ފުރަތަމަ ފަހަރަށް 1,000 ރުފިޔާ، ދެވަނަ ފަހަރަށް 1,500 ރުފިޔާ އަދި ތިންވަނަ ފަހަރަށް 2,000 ރުފިޔާއިން ޖޫރިމަނާކުރާނެއެވެ. އިތުރުވާ ކޮންމެ ފަހަރަކު އެންމެ ފަހުން ކުރި ޖޫރިމަނާގެ ދެގުނަ އިތުރުވާނެއެވެ.

މީގެ އިތުރުން އެ ދުއްވި އުޅަނދު ގިނަވެގެން 30 ދުވަހަށް ހިފެހެއްޓުމާ އެކު، އުޅަނދުގެ ވެރިމީހާ 2،000 ރުފިޔާއިން ޖޫރިމަނާކުރެވޭނެއެވެ.