ސިއްރުން ރާއްޖެއިން ބޭރަށް ގެންދަން އުޅުނު 81،130 ޑޮލަރު ދައުލަތަށް ނަގައި، ކުށުގެ އަދަބެއްގެ ގޮތުން 12،000 ރުފިޔާ އިން ޖޫރިމަނާ ކުރުމަށް ކްރިމިނަލް ކޯޓުން ނިންމައިފިއެވެ.

އެ މައްސަލައަކީ ހުސްވި އޮގަސްޓު މަހުގެ 25 ވަނަ ދުވަހު، ބަންގްލަދޭޝްއަށް ފުރަން އުޅުނު ޝަހްމިން އިސްލާމް ޝަގުރް ނަމަކަށް ކިޔާ ބަންގްލަދޭޝް މީހެއްގެ ލަގެޖް ޗެކް ކުރިއިރު، އޭނާ ގެންގުޅުނު ކަޅުކުލައިގެ ބެކްޕެކް ތެރޭގައި އޮތް ހުދުކުލައިގެ ކޮތަޅެއްގެ ތެރޭގައި ފޮރުވައިގެން ސިއްރުން ރާއްޖެއިން ބޭރަށް ގެންދަން އުޅުނު ޖުމުލަ 81,130 (އަށްޑިހަ އެއްހާސް އެއްސަތޭކަ ތިރީސް) އެމެރިކާ ޑޮލަރު ފެނުނު މައްސަލައެކެވެ. އެ ފައިސާ ފެނުމާއެކު، އޭނާ ވަނީ ކަމާ ބެހޭ އިދާރާތަކުގެ ބެލުމުގެ ދަށަށް ގެންގޮސްފައެވެ.

އޭނާގެ މައްޗަށް ކުރެވުނީ ދިވެހިރާއްޖޭގެ ކަސްޓަމްސްގެ ޤާނޫނުގެ 97 ވަނަ މާއްދާގެ (ހ) އާ ޙަވާލާދީ އެ މާއްދާގެ (ރ) އާއި (ބ) ގެ ދަށުން، ދިވެހިރާއްޖެއިން ސިއްރުން މުދާ ބޭރު ކުރަން އުޅުމުގެ ދައުވާއެވެ.

އެގޮތުން އެ މައްސަލައިގައި އޭނާ ކްރިމިނަލް ކޯޓަށް ޙާޒިރުކުރުމުން، އޭނާ ސިއްރުން މުދާ ބޭރުކުރުން އުޅުނު ކަމަށް އިއުތިރާފްވެފައިވާތީ، އެ މައްސަލަ އޭނާގެ މައްޗަށް ސާބިތުވިކަމަށް ކަނޑައަޅާފައިވެއެވެ. އެގޮތުން އެ މައްސަލައިގައި އޭނާ އާއި ޕްރޮސެކިއުޓާ ޖެނެރަލް (ޕީޖީ)ގެ އޮފީހާއެކު ވެފައިވާ އިއުތިރާފުގެ އެއްބަސްވުމުގެ ދަށުން އަދަބާ މެދު އެއްބަސްވެފައިވާތީވެ، އެ މައްސަލަ ބެއްލެވި ފަނޑިޔާރު އަދަބު ވެސް ކަނޑައެޅުއްވީ އެ އެއްބަސްވުމުގައިވާ ގޮތުގެ މަތީންނެވެ. އެގޮތުން އެ މައްސަލައިގައި ޝަރީޢަތުން އަދަބު ކަނޑައެޅުމުގައި ރިޢާޔަތްކޮށްފައިވަނީ ވެސް، ޝަރީޢަތުން ބަލައިގަތުމަށް ނިންމި އިޢުތިރާފުގެ އެއްބަސްވުމަށެވެ.

އެގޮތުން އެ އެއްބަސްވުމުގައި ވަނީ، އޭނާގެ އަތުން ފެނުނު 81،130 ޑޮލަރު ދައުލަތަށް ނެގުމަށް އެއްބަސްވެފައެވެ. އަދި އެ އެއްބަސްވުމުގެ ދަށުން، ކުށުގެ އަދަބެއްގެ ގޮތުގައި 12،000 ރުފިޔާ އިން ޖޫރިމަނާ ކުރުމަށް ވެސް ވަނީ ކަނޑައަޅާފައެެވެ.

އެހެން ނަމަވެސް، އެ މައްސަލައިގައި ހިމެނޭ ޝަހްމިނުގެ އަމިއްލަ ފައިސާގެ ތެރޭގައި ހިމެނޭ 4،500 ޑޮލަރާއި، 350 ޔޫރޯ ވަނީ ކަސްޓަމްސް އިން ހިފަހައްޓާފައިކަމުން، ޖޫރިމަނާ ދެއްކޭނީ އެ ފައިސާ ލިބުމުން ކަމުގައި ޝަހްމިން ކޯޓުގައި ބުނެފައިވެއެވެ. އެކަމާ ގުޅިގެން، އެ މައްސަލަގައި ޙުކުމް ކުރާތާ ފަސް ދުވަހުގެ ތެރޭގައި އެ ފައިސާ އޭނާއާ ހަވާލުކުރެވޭނެ ކަމަށް ދައުލަތުގެ ފަރާތުން ބުނެފައިވެއެވެ.

އެ މައްސަލައިގައި ކޯޓުން ކުރި ޙުކުމުގައި ވަނީ، އިއްޔެ އިން ފެށިގެން 15 ދުވަހުގެ ތެރޭގައި އެ ފައިސާ މީރާއަށް ދެއްކުމަށް އޭނާގެ މައްޗަށް ޙުކުމްކޮށްފައެވެ. އަދި 81،130 ޑޮލަރު ކަސްޓަމްސްއަށް ނެގުމަށް ވެސް ޙުކުމްކޮށްފައިވެއެވެ.