އަމިއްލަ ފަރުދުންގެ ގޭބީސީތަކުގެ ކަރަންޓުގެ ޚަރަދު ކުޑަ ކުރުމަށްޓަކައި މުޅި ރާއްޖޭގައި ހިންގުމަށް ހަމަޖެހިފައިވާ "މަގޭ ސޯލާ" ޕްރޮޖެކްޓާއެކު ރައްޔިތުންގެ ޖީބަށް ބޮޑު ލުޔެއް ލިބޭނެ ކަމަށާއި، މި މަޝްރޫޢު އަންނަ މަހު ފެށުމަށް ތައްޔާރު ވަމުން އަންނަ ކަމަށް، އެންވަޔަރަމަންޓް މިނިސްޓަރު ތޯރިގު އިބްރާހީމް މިއަދު ވިދާޅުވެއްޖެ އެވެ.

މިނިސްޓަރު ތޯރިގު މިހެން ވިދާޅުވީ ރައްޔިތުންގެ މަޖިލީހުގެ މިއަދު ޖަލްސާގައި ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް ކުރެއްވި ސުވާލަކަށް ޖަވާބު ދެއްވަމުންނެވެ.

މިނިސްޓަރު ވިދާޅުވީ ދިގު މުއްދަތަކަށް ބަހާލައިގެން އެ ސިސްޓަމް ގަތުމަށް ފައިސާ ދެއްކޭނެ ގޮތަކަށްވެސް ހަމަޖެހިގެންދާނެ ކަމަށެވެ.

އެ މަސައްކަތް މިހާރު ފެނަކައާއި ސްޓެލްކޯއާ ގުޅިގެން ފައްޓާފައިވާނެ ކަމަށާއި އެ ސިސްޓަމްތަކުގެ ފުރަތަމަ 700 ޔުނިޓް އައުމުގެ މަގުމަތީގައި ހުރި ކަމަަށް މިނިސްޓަރ ވިދާޅުވި އެވެ. އަދި އޭގެ އެއްބައި ސޯލާ ސިސްޓަމްތައް މާލޭގެ ބަނދަރުގާ ހުންނާނެ ކަމަށް ގަބޫލުކުރެވޭ ކަމަށް ވެސް މިނިސްޓަރ ވިދާޅުވި އެވެ.

މީގެ އިތުރުން މިނިސްޓަރ ވިދާޅުވީ، އަބަދުވެސް މަސައްކަތް ކުރަމުންދަނީ ކަރަންޓް ބިލު ކުޑަކުރެވޭނެ ގޮތްތަކަކީ ކޮބައިތޯ ބެލުމަށް ކަމަށާއި، އެގޮތުން ބެލިި ބެލުމުގައި އެ މައްސަލަ ދިމާވާ އެއް ސަބަބަކީ ތެލަށް ކުރާ ހޭދަ ބޮޑުވުން ކަމަށެވެ.

މުޅި ރާއްޖެއަށް ސޯލާ ސިސްޓަމް ތަރައްގީކުރުމުގެ މަސައްކަތް ކުރަމުންދާކަން ފާހަގަކުރައްވާ މިނިސްޓަރ ތޯރިގު ވިދާޅުވީ ރާއްޖޭގެ ހުރިހާ ސަރަހައްދެއްގައި އުފައްދާ ކަރަންޓްގެ 33 އިންސައްތައަކީ އިއާދަކުރަނިވި ހަކަތައަށް ހެދުމަށް ޑރ. މުހައްމަދު މުއިއްޒު މަސައްކަތްކުރައްވާ ކަމަށެވެ.