ރައީސުލްޖުމްހޫރިއްޔާގެ ރިޔާސީ ވައުދުފުޅުގެ ތެރޭގައި ހިމެނޭ އަދި އެމަނިކުފާނު ވަރަށް ހާއްސަ އިސްކަމެއް ދެއްވައިގެން ކުރިއަށްގެންދަވާ 'އިހްތިރާމް އަދާކުރުމުގެ ގައުމީ މަޝްރޫއު' ގެ ވިލަރެސް ކޮމިޓީ އެކުލަވާލައި، އެ ކޮމިޓީގެ ފުރަތަމަ ބައްދަލުވުން މިއަދު ބާއްވައިފިއެވެ.

މި ބައްދަލުވުން ކުރިއަށް ގޮސްފައިވަނީ ފަންނާއި ސަގާފަތާއި ތަރިކައާ ބެހޭ ވުޒާރާގައެވެ. މި މަޝްރޫއު ކުރިއަށް ގެންދިއުމަށްޓަކައި ރައީސުލްޖުމްހޫރިއްޔާގެ ހާއްސަ ވިލަރެސް ކޮމިޓީއެއް އެކުލަވާލައި ފުރަތަމަ ބައްދަލުވުން ބޭއްވި އިރު، މި ކެމްޕެއިން ފެށުމަށް ވާންޖެހޭ އެންމެ ފަހުގެ ތައްޔާރީތައް މިހާރު ދަނީ ވަމުންނެވެ.

Ad by Hajj Corporation

ކޮމިޓީ އެކުލެވިގެންވާ ގޮތް

މި މަޝްރޫއުގެ ކަންކަން ވިލަރެސްކޮށް، ހިންގުން ހަރުދަނާކުރުމަށްޓަކައި އެކުލަވާލާފައިވާ ވިލަރެސް ކޮމިޓީގައި ކަމާގުޅުންހުރި ވުޒާރާތަކާއި މުއައްސަސާތައް ހިމެނޭހެން ޖުމްލަ 9 މެންބަރުން ހިމެނެއެވެ. މި ކޮމިޓީގައި ހިމެނިވަޑައިގަންނަވާ ބޭފުޅުންނަކީ:

• ފަންނާއި ސަގާފަތާއި ތަރިކައާ ބެހޭ ވުޒާރާ: އިބްރާހިމް ސޮބާހް (ޑެޕިއުޓީ މިނިސްޓަރ)
• ދާޙިލީ ސަލާމަތާއި، މަސައްކަތްތެރިކަމާއި ފަންނިއްޔަތާ ބެހޭ ވުޒާރާ: ނަސްރީނާ އިދްރީސް (ޑިރެކްޓަރ)
• ދިފާޢީ އަދި ވަޠަނީ ޚިދުމަތާ ބެހޭ ވުޒާރާ: އަލީ ފަހުމީ (ކެޕްޓަން)
• ތަޢުލީމާއި މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާ: މުޙައްމަދު ނާތީމް (އެޑިއުކޭޝަން ސްޕްރިންޓެންޑެންޓް)
• މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާ: އަޙްމަދު އައިމަން (ޑެޕިއުޓީ މިނިސްޓަރ)
• ސިއްޙަތާއި ޢާއިލާއާއި އިޖުތިމާޢީ އެހީއާއި ބެހޭ ވުޒާރާ: މަރްޔަމް ލަހުފާ ޙަލީލް (ޑެޕިއުޓީ މިނިސްޓަރ)
• އިސްލާމީކަންތައްތަކާއި ބެހޭ ވުޒާރާ: އައްޝައިޚް އަޙްމަދު ފަހުމީ ދީދީ (ވާއިޡް)
• ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާ: ޝާދިޔާ އަޙުމަދު (ޑިރެކްޓަރ)
• ޕަބްލިކް ސާވިސް މީޑިއާ (ޕީއެސްއެމް): އިބްރާހިމް އިޤްބާލް (އެގްޒެކެޓިވް ޑިރެކްޓަރ)

މިއަދު ބޭއްވުނު މި ކޮމިޓީގެ ފުރަތަމަ ބައްދަލުވުމުގައި، އިހްތިރާމް އަދާކުރުމުގެ ގައުމީ މަޝްރޫއު ކުރިއަށްގެންދަން ރޭވިފައިވާ ގޮތްތަކާއި، މި މަޝްރޫއުގައި ކޮމިޓީން އަދާކުރާނެ ދައުރާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކޮށްފައެވެ. އަދި މި މަޝްރޫއު އެންމެ ފުރިހަމަ ގޮތުގައި ކުރިއަށް ގެންދިއުމަށްޓަކައި އަޅަންޖެހޭ ފިޔަވަޅުތަކާއި، ކަމާގުޅޭ އިދާރާތައް ގުޅިގެން މަސައްކަތްތައް ރޭވުމާ ގުޅޭގޮތުން ވެސް މެންބަރުންގެ މެދުގައި ވަނީ ހިޔާލު ބަދަލުކުރައްވާފައެވެ.