ދިވެހިރާއްޖެއަކީ ދުނިޔޭގެ އެންމެ ރައްކާތެރި ގައުމަށް ހެދުމަކީ ސޭފްޓީ އެންޑް ސެކިޔުރިޓީ ދާއިރާގެ އެންމެންގެ އަޒުމަކަށް ވާންޖެހޭނެ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ. 

މޯލްޑިވްސް އެސޯސިއޭޝަން އޮފް ފަޔަރ، ސޭފްޓީ އެންޑް ސެކިޔުރިޓީ އިންޑަސްޓްރީ (މަފްސީން) އިން އިންތިޒާމްކޮށްގެން ދެ ދުވަހުގެ މުއްދަތަށް ކުރިއަށްގެންދާ ސޭފްޓީ އެންޑް ސެކިޔުރިޓީ ކޮންފަރެންސް ފެށުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުން ވަޒީރު ވިދާޅުވީ، ދުނިޔޭގެ އެންމެ މަގުބޫލް މަންޒިލްތަކުގައި ރާއްޖެ ފާހަގަކުރާއިރު، ރާއްޖެ އަންނަ މެހެމާނުންގެ ރައްކާތެރިކަން އެންމެ ފުރިހަމައަށް ކަށަވަރުކޮށްދޭންޖެހޭ ކަމަށެވެ. އެގޮތުން ސަރުކާރުގެ މުއައްސަސާތަކާއި، ފަތުރުވެރިކަމާއި ސެކިޔުރިޓީ ދާއިރާގެ އަމިއްލަ ފަރާތްތައް ގުޅިގެން މި މަސައްކަތްކުރުމުގެ މުހިންމުކަން ވަޒީރު ފާހަގަކުރެއްވިއެވެ.

Ad by Hajj Corporation

 ފަތުރުވެރިކަމުގެ ދާއިރާގައި އާންމުކޮށް ފެންނަ ކުށްތަކުގެ އިތުރުން، އަލިފާނާއި ކަނޑުމަތީގެ ހާދިސާތަކާއި، ގުދުރަތީ ކާރިސާތަކާއި، ސައިބަރ ހަމަލާތާކައި އޮންލައިންކޮށް ހިންގާ ފްރޯޑް އަމަލުތަކާއި، މަސްތުވާތަކެއްޗާ ގުޅުންހުރި މައްސަލަތަކާއި، އަދި އާންމު ސިއްހަތާ ގުޅުންހުރި ކަންކަމަށް ހާއްސަ ސަމާލުކަމެއް ދޭންޖެހޭ ކަމަށް މިނިސްޓަރު ވިދާޅުވިއެވެ. އަދި ރާއްޖެ ފަދަ ކުޑަ ޖަޒީރާ ގައުމެއްގައި ދުނިޔޭގެ އެކި ކަންކޮޅުތަކުގައި ފެތުރެމުންދާ ކަންކަން ފެތުރުމުގެ ފުރުސަތު ބޮޑުވެފައި، ކަމެއް ވުމުގެ ކުރިން އެކަމަށް ތައްޔާރުވެފައި ތިބުމުގެ މުހިންމުކަން އެމަނިކުފާނު ފާހަގަކުރެއްވިއެވެ.

ރާއްޖެއަކީ ރައްކާތެރި އަދި ވިލުންތެރި މަންޒިލަކަށް ހެދުމަށްޓަކައި ހަރުދަނާ ސިޔާސަތުތަކާއި، ތަމްރީނުތަކާއި، އިންވެސްޓް‌މަންޓާއި، ޓެކްނޮލޮޖީގެ އިތުރުން މުއައްސަސާތައް ގުޅިގެން މަސައްކަތްކުރަންޖެހޭ ކަމަށާއި، މިކަމުގައި ފަތުރުވެރިކަމުގެ ދާއިރާއަށް ސަރުކާރުގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން ވަޒީރު ދެއްވިއެވެ.

މިއީ ރާއްޖޭގެ ފަތުރުވެރިކަމުގެ ދާއިރާއަށް ހާއްސަކޮށްގެން މިފަދަ ކޮންފަރެންސެއް ބޭއްވިފުރަތަމަ ފަހަރެވެ. ދެ ދުވަހުގެ ނިޔަލަށް ކުރިއަށްދާ މި ކޮންފަރެންސްގައި ދައުލަތުގެ އެކި މުއައްސަސާތަކާއި، ކުންފުނިތަކާއި އަދި ސެކިޔުރިޓީ ދާއިރާގެ ފަރާތްތަކުން ބައިވެރިވެ، ރާއްޖެއާއި ރާއްޖެއިން ބޭރުގެ ތަޖުރިބާކާރުންގެ ސެޝަންތައް ކުރިއަށްގެންދެއެވެ.