ކުޑަކުދިންނަށް ކުރާ އެކި ބާވަތުގެ އަނިޔާ ހުއްޓުވުމަށާއި، ކުޑަކުދިންގެ ޙައްޤުތައް ރައްކާތެރިކުރުމުގެ ނިޒާމު ވަރުގަދަކޮށް، ކުޑަކުދިންނަށް އަނިޔާ ކޮށްގެން ހުށަހަޅާ މައްސަލަތަކަށް އިޖާބަދިނުމަށް ބައިނަލްއަޤްވާމީ ފެންވަރުގައި ކުރެވޭ މަސައްކަތްތަކާއި އަދި ގައުމީ ފެންވަރުގައި ކުރެވޭ މަސައްކަތްތައް އިތުރަށް ހަރުދަނާކުރުމުގެ މަޤުސަދުގައި އެކުލަވާލައިފައިވާ "ބޮގޯޓާ ކޯލް ޓު އެކްޝަން" ޤަރާރުގައި ދިވެހިރާއްޖެއިން މިއަދު ސޮއިކޮށްފިއެވެ.

"ބޮގޮޓާ ކޯލް ޓު އެކްޝަން" އަކީ 2024 ވަނަ އަހަރުގެ ނޮވެންބަރު މަހު ކޮލަމްބިއާގެ ބޮގޮޓާގައި ބޭއްވި، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަޤުވާމީ މަހާސިންތާގައި ބައިވެރިވި ގައުމުތަކުން އިސްނަގައިގެން އިފުތިތާޙުކުރި މުހިއްމު ޤަރާރެކެވެ.

Ad by Hajj Corporation

ދިވެހިރާއްޖެގެ ފަރާތުން "ބޮގޯޓާ ކޯލް ޓު އެކްޝަން" ގައި ސޮއި ކުރައްވާފައިވަނީ މިނިސްޓަރ އޮފް ހެލްތް، ފެމިލީ އެންޑް ވެލްފެއަރ ޤީލާ ޢަލީ އެވެ.

މި ޤަރާރުގެ މައިގަނޑު މަޤްސަދަކީ ކުޑަކުދިންނަށް ކުރާ އަނިޔާ ހުއްޓުވުމަށާއި އެފަދަ ކަންކަމާ ގުޅިގެން ފިޔަވަޅު އެޅުމަށް ބައިނަލްއަޤްވާމީ ފެންވަރުގައި ކުރެވޭ މަސައްކަތްތައް ހަރުދަނާކޮށް، ކުޑަކުދިން ރައްކާތެރިކުރުމުގެ ނިޒާމު އިތުރަށް ވަރުގަދަކުރުމެވެ.

މި ޤަރާރުގައި މައިގަނޑު ގޮތެއްގައި އަލިއަޅުވާލާފައިވަނީ ހޯދުންތަކާއި ހެކިތަކުގެ މައްޗަށް ބިނާވެފައިވާ ރައްކާތެރިކަމުގެ ފިޔަވަޅުތައް އެޅުމަށާއި، ޤާނޫނީ އަދި ސިޔާސަތުތަކުގެ އޮނިގަނޑުތައް ހަރުދަނާކުރުމަށާއި، ކުޑަކުދިން ހިމާޔަތްކުރުމުގެ ނިޒާމުތައް ވަރުގަދަކުރުމުގެ މައްޗަށެވެ. މީގެ އިތުރުން، ޑިޖިޓަލް މާޙައަލުތަކުގައި ކުޑަކުދިންނަށް ރައްކާތެރިކަން ކަށަވަރުކޮށްދިނުމާއި، އިދާރީ ގުޅުންތަކާއި ބައިވެރިވުން އިތުރުކުރުމުގެ އިތުރުން، ކުޑަކުދިންގެ ރައްކާތެރިކަމާއި ލާބައާ ގުޅުންހުރި ނިންމުންތަކުގައި އެކުދިންގެ ބައިވެރިވުން މާނަހުރި ގޮތެއްގައި ހިމެނުމަށްވެސް މި ޤަރާރުގައި ބާރުއަޅާފައިވެއެވެ.

ބޮގޯޓާ ކޯލް ޓު އެކްޝަންގައި ހިމެނޭ ކަންކަމަކީ، ކުޑަކުދިންނަށް ކުރާ އަނިޔާ ހުއްޓުވުމަށާއި އެފަދަ ކަންކަމަށް އިޖާބަދިނުމަށް ދިވެހިރާއްޖެއިން 2024 ވަނަ އަހަރު އެކުލަވާލި 'ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޯންޑިންގ ޓު ވަޔަލެންސް އަގެއިންސްޓް ޗިލްޑްރަން' އާ ގުޅިލާމެހިފައިވާ ކަންކަމެވެ. ރާއްޖެއިން އެކުލަވާލި މި ޕްލޭންގެ މައިގަނޑު އަމާޒަކީ އަނިޔާއިން ރައްކާތެރިވުމަށް އިސްކަންދީގެން، ގޭތެރެއާއި، ތައުލީމުދޭ މަރުކަޒުތަކާއި، މުޖުތަމަޢުގެ ތެރޭގައާއި އަދި އިންޓަނެޓްގެ ވަސީލަތްތައް ބޭނުންކުރުމުގައި ވެސް ކުޑަކުދިންނަށް އަމާން އަދި ރައްކާތެރިކަން ލިބޭނެ މާޙައުލެއް ކަށަވަރުކޮށްދިނުމެވެ.

މީގެ އިތުރުން، މި ޕްލޭންގައި ކުޑަކުދިން ރައްކާތެރިކުރުމުގެ ނިޒާމު އިތުރަށް ހަރުދަނާކުރުމަށްވެސް ވަނީ އިސްކަންދީފައެވެ. މީގެ މަޤުސަދަކީ ނުރައްކަލަށް ހުށަހެޅިފައިވާ ކުދިން ދުރާލާ ދެނެގަނެ، އެކުދިންނަށް ފުރިހަމަ ރައްކާތެރިކަމާއި، އަޅާލުމާއި އެހީތެރިކަން އެންމެ އެދެވޭ ގޮތެއްގައި ފޯރުކޮށްދިނުމެވެ. އަދި މީގެ އިތުރުން، އަނިޔާގެ މައްސަލައެއް ހުށަހެޅިއްޖެ ހާލަތުގައި ފޯރުކޮށްދެވޭ ޙިދުމަތްތަކަކީ، ރައްކާތެރި އަދި އެކުދިންގެ މަސްލަހަތު އެންމެ އިސްކޮށްގެން ދެވޭ ޙިދުމަތްތަކެއްކަން ކަށަވަރުކުރުމެވެ.

މި ޤަރާރުގައި ސޮއިކުރުމަށް 29 ސެޕްޓެމްބަރ 2026 ގައި ބޭއްވި ރަސްމިއްޔާތުގައި މިނިސްޓަރ ޤީލާ ޢަލީ ފާހަގަކުރެއްވި ގޮތުގައި، ކުޑަކުދިންނަށް ކުރާ އަނިޔާ ހުއްޓުވުމުގައި މާނަހުރި ކުރިއެރުމެއް ހޯދުމަށް ދެމެހެއްޓެނިވި މަސައްކަތްތަކެއް ބޭނުންވެއެވެ. މީ

ކުޑަކުދިން ރައްކާތެރިކުރުމުގެ ނިޒާމު ހަރުދަނާކުރުމަށާއި އަދި އެކުދިންނަށް ފާގަތި މުސްތަޤްބަލެއް ހޯދައިދިނުމަށް މި ސަރުކާރުން ދެއްވާ އަހަންމިއްޔަތުކަން ފާހަގަކުރައްވައި މިނިސްޓަރ ޤީލާ ޢަލީ ވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އަށް ޝުކުރު އަދާކުރައްވައިފައެވެ. އަދި ކުޑަކުދިންގެ ހައްޤުތަކާއި، ރައްކާތެރިކަމާއި އަދި ލާބައަށްޓަކައި ކުރެވޭ މަސައްކަތްތަކުގައި ޔުނިސެފާއި އެހެނިހެން ބައިވެރިން ދެއްވާ އެއްބާރުލުން ފާހަގަކޮށް މިނިސްޓަރ ވަނީ އެ ހުރިހާ ފަރާތްތަކަށް ޝުކުރު އަދާކުރައްވައިފައެވެ.

މިއަދު ދިވެހިރާއްޖެއިން ސޮއިކުރި ބައިނަލްއަޤުވާމީ ޤަރާރުގެ ދަށުން ކުރެވޭ މަސައްކަތްތަކަކީ ކުޑަކުދިންގެ ދިރިއުޅުމަށް ދެމެހެއްޓެނިވި އަދި ދާއިމީ ހެޔޮ ބަދަލުތަކެއް ގެނުވައިދޭނެ އަމަލީ މަސައްކަތްތަކަކަށް ހެދުމަށްޓަކައި، ރާއްޖެ އާއި އަދި ބައިނަލްއަޤުވާމީ އެކި އިދާރާތަކާއިއެކު ގުޅިގެން މަސައްކަތްކުރުމުގައި ރާއްޖެ ދެމިއޮންނާނެކަމުގެ ޔަގީންކަން މިނިސްޓްރީ އޮފް ހެލްތް، ފެމިލީ އެންޑް ވެލްފެއަރ އިން ވަނީ ދެއްވާފައެވެ.