އުމުރުން 38 އަހަރުގައިވެސް ޕޮލެންޑްގެ ތަރި ރޮބާޓް ލެވަންޑޮސްކީ ޒުވާން ކުޅުންތެރިންނާ އެއްހަމައެއްގައި ފައިހަމަ ކުރާނެ ކަމުގެ ޔަޤީންކަން ޤައުމީ ޓީމުގައި އޭނާ އަންނަނީ ސާބިތު ކޮށްދެމުންނެވެ.

މިހާރު ކުރިޔަށްދާ ޔޫއެފާ ނޭޝަންސް ލީގުގެ ގްރޫޕް ބީގައި އެންމެފަހުން ރޮމޭނިއާއާ ދެކޮޅަށް ކުޅުނު މެޗްގައި ލެވަންޑޯސްކީވަނީ ހެޓްރިކް ހަދާ އެކަން ވަރަށް ރަނގަޅަށް ސާބިތު ކޮށްދީފައެވެ. އެމެރިކާގެ ޗިކާގޯ ފަޔައަށް ކުޅެމުން އަންނަ ލެވަންޑޯސްކީ ރޮމޭނިއާއާ ދެކޮޅަށް ކުޅުނު މެޗްގެ ފުރަތަމަ ހާފްގައި އެޓީމަށް ލީޑް ނަގައިދިނީ 24 ވަނަ މިނިޓްގައި ލިބުނު ޕެނަލްޓީއެއް ކާމިޔާބު ކޮށްގެންނެވެ. މިމެޗްގެ ފުރަތަމަހާފްގައި ރޮމޭނިއާގެ ކުޅުންތެރިއަކަށް ރަތްކާޑެއް ދެއްކުމުގެ ސަބަބުން އެއްކުޅުންތެރިއަކު މަދުކޮށް ކުޅުނު މެޗްގެ ދެވަނަ ހާފް ވެގެންދިޔައީ އެޓީމަށް ޕޮލެންޑް ހިފަހައްޓާ ނުލެވުނު ހާފެއްގެ ގޮތުގައެވެ. ދެވަނަ ހާފްގައި ރޮމޭނިއާވަނީ 5 ލަނޑު ކާމިޔާބުކޮށްފައެވެ. ދެވަނަ ޙާފްގައި ކާމިޔާބު ކުރި 5 ލަނޑުގެ ތެރެއިން 2 ލަނޑު ކާމިޔާބުކޮށްދިނީ ތަޖުރިބާކާރު ސްޓްރައިކަރ ލެވަންޑޯސްކީއެވެ. ހައެއް ސުމަކުން ޕޮލެންޑް ކާމިޔާބު ކުރި މިމެޗްގައި އަނެއް 3 ލަނޑުގެ ތެރެއިން އެއްލަނޑަކީ ރޮމޭނިއާ ކުޅުންތެރިއެއްގެ އަތުން ބައިކޮޅަށް ވަތް ލަނޑެކެވެ. ޕޮލެންޑްގެ ނަރްޒޯވީ ސްޓޭޑިއަމްގައި ކުޅުނު މިމެޗްގައި، އެޓީމަށް އަނެއް 2 ލަނޑު ކާމިޔާބުކޮށްދިނީ ޒިއެލެންސްކީއާއި ޖެން ބެޑްނަރެކްއެވެ.

Ad by Hajj Corporation

ޔޫއެފާ ނޭޝަންސް ލީގުގެ ގްރޫޕް ބީގައި މިހާތަނަށް ޕޮލެންޑް ކުޅުނު 3 މެޗްގެތެރެއިން އެޓީމަށް 3 ޕޮއިންޓް ކަށަވަރު ކުރެވުނު މެޗަކީވެސް ރޮމޭނިއާ ދެކޮށް ކުޅުނު މެޗެވެ. މި ގްރޫޕްގައި ކުޅުނު 3 މެޗުން ލިބުނު 7 ޕޮއިންޓާއެކު ގްރޫޕްގެ އެއްވަނައިގައި އޮތީ ސްވިޑްންއެވެ. 5 ޕޮއިންޓާއެކު ދެވަނައިގައި އޮތީ ބޮސްނިއާއެވެ. 4 ޕޮއިންޓާއެކު ޕޮލެންޑް 3 ވަނަިގައި އޮތްއިރު ކުޅުނު އެއްވެސް މެޗަކުން ޕޮއިންޓެއް ނުލިބި ރޮމޭނިއާ އޮތީ އެގްރޫޕްގެ އެންމެ ފުލުގައެވެ.