އިންޑިއާގެ މަޝްހޫރު އީ-ކޮމާސް ޕްލެޓްފޯމް 'ގްލޯބަލް ދުކާން' މެދުވެރިކޮށް ވިޔަފާރިކުރާ ދިވެހި ކަސްޓަމަރުންނަށް ފަސޭހަކަމާއެކު ދިވެހި ރުފިޔާއިން ފައިސާ ދެއްކޭނެ އިންތިޒާމު މޯލްޑިވްސް ޕޯސްޓް ލިމިޓެޑުން ތައާރަފުކޮށްފިއެވެ.

މޯލްޑިވްސް ޕޯސްޓުން ހާމަކުރި ގޮތުގައި، ގްލޯބަލް ދުކާނުން ވިޔަފާރިކުރުމަށްފަހު ޗެކްއައުޓް ކުރާ ވަގުތު "ޕޭ ތުރޫ މޯލްޑިވްސް ޕޯސްޓް" އިޚުތިޔާރު ކުރުމަށްފަހު، އެތަނުގައިވާ އިރުޝާދުތަކާ އެއްގޮތަށް ފައިސާގެ މުއާމަލާތް ފުރިހަމަކުރެވޭނެއެވެ. އަދި ފައިސާ ދައްކާއިރު ޝަރުތުހަމަވާ ކަސްޓަމަރުން ބޭނުންވާނަމަ، ދިވެހި ރުފިޔާއިން ފައިސާ ދެއްކުމަށްޓަކައި ޕޭމަންޓް ލިންކެއް ގްލޯބަލް ދުކާން އެޕްލިކޭޝަން މެދުވެރިކޮށް ލިބިގެންދާނެއެވެ.

Ad by Hajj Corporation

މި އައު ޚިދުމަތަކީ، ގްލޯބަލް ދުކާން މެދުވެރިކޮށް ތަކެއްޗަށް އޯޑަރުކުރާއިރު ބޭރު ފައިސާއިން މުއާމަލާތްކުރަން ޖެހޭ ބައިނަލްއަޤުވާމީ ޕޭމަންޓް މެތަޑުތަކުގެ ބަދަލުގައި، ދިވެހި ރުފިޔާއިން ފަސޭހަކަމާއެކު ފައިސާ ދެއްކުމަށް ހުޅުވިގެންދިޔަ ރަނގަޅު ފުރުސަތެކެވެ. މީގެ ސަބަބުން ދިވެހިރާއްޖޭގެ ކަސްޓަމަރުންނަށް ގްލޯބަލް ދުކާންގެ ޚިދުމަތްތައް ހޯދުމުގައި އިތުރު ފަސޭހަތަކެއް ލިބި، ފައިސާ ދެއްކުމުގެ މަރުހަލާ ކުރިއަށްވުރެ ބޮޑަށް ލުއިވެގެންދާނެ ކަމަށް ޕޯސްޓުން ފާހަގަކުރެއެވެ.

ކުރިއެކޭވެސް އެއްފަދައިން، މޯލްޑިވްސް ޕޯސްޓާއި އިންޑިއާ ޕޯސްޓް ގުޅިގެން އިންޑިއާގެ އީ-ކޮމާސް މާކެޓު ޕްލޭސް ގްލޯބަލް ދުކާން މެދުވެރިކޮށް ތަކެތި ގަތުމުން ރާއްޖޭގެ ކޮންމެ ހިސާބަކަށްވެސް ޑެލިވަރ ކޮށްދޭނެއެވެ. އަދި މި ޕްލެޓްފޯމުން ވިޔަފާރި ކުރުމަށް އިންޑިއާގެ އެޑްރެހެއް ބޭނުމެއް ނުވާނެއެވެ.

ގްލޯބަލް ދުކާންގައި ހިމެނޭ މަޝްހޫރު އީ-ކޮމާސް ޕްލެޓްފޯމްތަކުގެ ތެރޭގައި އެމެޒަން، މިންތްރާ، ފްލިޕްކާޓް، ނައިކާ، ނައިކާ ފެޝަން އަދި އިކިއާ ފަދަ ބްރޭންޑުތައް ހިމެނެއެވެ.

ގްލޯބަލް ދުކާނަކީ ދިވެހިންގެ މެދުގައި ބޮޑު މަޤްބޫލުކަމަކާއި އިތުބާރެއް ހޯދާފައިވާ ޕްލެޓްފޯމެކެވެ. ޕޯސްޓް އޮފީހުން ފާހަގަކުރާ ގޮތުގައި، ކަސްޓަމަރުންނަށް ފަސޭހަކަމާއެކު ދިވެހި ރުފިޔާއިން ފައިސާ ދެއްކޭނެ ގޮތް ހަމަޖެހުމަކީ ދިވެހިންނަށް އޮންލައިންކޮށް ވިޔަފާރި ކުރުމަށާއި ބައިނަލްއަޤުވާމީ މާކެޓްޕްލޭސްއަށް ވާސިލުވުމަށް ލިބުނު މުހިންމު ކުރިއެރުމެކެވެ.