ލަ ލީގާ ތާވަލުގެ އެންމެ މަތީގައި 3 ޕޮއިންޓުގެ ލީޑެއް ހިފަހައްޓައިގެން ސެވިއްޔާއާ ދެކޮޅަށް ކުޅުނު މެޗުން ފަސޭހަ ކަމާއެކު ކާމިޔާބުކުރުމަށްފަހު ، ބާސެލޯނާ އަނެއްކާވެސް ދަނޑަށް މިރޭ ނިކުންނަނީ މިސީޒަންގައި މިހާތަނަށް އެންމެ މުހިންމު މެޗަށެވެ. ކެޓަލޯނިއާ ގެ އޮލިމްޕިކް ސްޓޭޑިއަމްގައި ކުޅޭ މި މެޗުގައި ހެންސީ ފްލިކް އޭނާގެ ކުރީގެ ކުލަބު ބަޔަން މިއުނިކާ ބައްދަލުކުރާނެއެވެ. މިއީ މި ހަފްތާގެ ޔޫއެފާ ޗެމްޕިއަންސް ލީގުު ގްރޫޕް ސްޓޭޖުގެ އެންމެ ބޮޑު މެޗު ކަމާމެދު ޝައްކެއް ނެތެވެ.ދެ މަސް ވަންދެން ފެންވަރު ރަނގަޅު ކުޅުމެއް ދައްކައި، ވިދިވިދިގެން ކާމިޔާބީތައް ހޯދުމަށްފަހު، ފްލިކްގެ ބާސާއާ ބެހޭ ގޮތުން މިހާރު އޮތީ އެންމެ ސުވާލެކެވެ. އެއީ އެމީހުން މިހާ ރަނގަޅުތޯ، ނުވަތަ މިހާތަނަށް އެލީޓް ޓީމަކާ ކުރިމަތިނުލާ ތިބީތޯއެވެ؟ މިރޭ ކުޅޭ ބަޔާން މެޗަށްފަހު ދެން ބާސެލޯނާ ނިކުންނާނީ އެލް ކްލެސިކޯގައި ހޮނިހިރު ދުވަހު ރިއަލް މެޑްރިޑް އާއި ދެކޮޅަށެވެ. ބަޔާން އާއި ބާސެލޯނާ އެންމެ ފަހުން ބައްދަލުކުރި 8 މެޗުގެ ތެރެއިން ބަޔާން ވަނީ 6 މެޗުން މޮޅުވެފައެވެ. އަދި ހަމަމިގޮތަށް ރެއާލް މެޑްރިޑާ ދެކޮޅަށް އެންމެ ފަހުން ކުޅުނު 4 މަޗުންވެސް އެޓީމު ވަނީ ބަލިވެފައެެވެ. އެހެންކަމުން މި ދެ މެޗަކީ ބާސެލޯނާގެ އަސްލު ފެންވަރު ވަޒަންކޮށްލުމަށް ލިބޭނެ ހަޤީޤީ އިމްތިޙާނެކެވެ. މި ދެ ޓެސްޓުން ފާސްވެއްޖެނަމަ، ހުރިހާ މުބާރާތެއްގައިވެސް ވާދަކުރުމުގެ ޤާބިލުކަން ބާސާގައި ހުރިކަމާމެދު ޝައްކެއް ނުއުފެދޭނެއެވެ.ނަމަވެސް، ބަޔާންއާއި މެޑްރިޑްގެ ފަރާތުން ބާސާގެ އުނިކަންތައްތައް ހާމަވުމަކީވެސް އެކަށީގެންވާ ކަމެކެވެ. ޚާއްޞަކޮށް ބާސާގެ ރިސްކު ބޮޑު ޑިފެންސިވް ސްޓްރެޓެޖީއާ ގުޅޭ ގޮތުންނެވެ. ބާސާގެ ހައި ލައިންއާއި އޮފްސައިޑް ޓްރެޕްގެ ސަބަބުން މިސީޒަންގައި މިހާތަނަށް ޔޫރަޕްގައި އެންމެ ގިނަ އޮފްސައިޑް ކޯލްތައް ދެވިފައިވަނީ ބާސާއަށެވެ. އެހެންނަމަވެސް މިކަމުގެ ސަބަބުން ބާސާގެ ޑިފެންސަށް ނުރައްކާތެރި ވަގުތުތަކެއްވެސް ކުރިމަތިވެފައިވެއެވެ. ދުނިޔޭގެ އެންމެ ނުރައްކާތެރި ދެ ފޯވަޑް ލައިނާ ދެކޮޅަށް ބާސާގެ އޮފްސައިޑް ޓްރެޕް ހިފެހެއްޓޭނެތޯ، ނުވަތަ އެންމެ މުހިންމު މެޗުތަކުގައި ފްލިކް އޭނާގެ ޓެކްޓިކްސްއަށް ކުޑަ ބަދަލެއް ގެންނަން ޖެހޭނެކަން ދަސްވާނެތޯ މިއީ އުފެދޭ ސުވާލެކެވެ. ބާސާ އަށް ފަހުގެ ތާރީޙުގައި އެންމެ ބޮޑެތި ހިތްދަތި ކަމާ ކުރިމަތިލާން ޖެހުނީ މި ދެޓީމާ ދެޚޮޅަަށް ކުޅެގެންނެވެ. އެހެން ކަމުން މި ދެމެޗަކީ ހުރިހާ ގޮތަކުން ވެސް ބާސެލޯނާއަށް ވަރަށް މުހިންމު ދެމެޗެވެ.