ރާއްޖޭގައި ފުރަތަމަ ދަނޑުވެރިކަމުގެ ބޯހިމެނުމުގެ މަސައްކަތް ފަށައިފި
16 ނޮވެމްބަރު 2026 - 05:24

ރާއްޖޭގައި ބާއްވާ ފުރަތަމަ ދަނޑުވެރިކަމުގެ ބޯހިމެނުމުގެ މަސައްކަތް ރަސްމީކޮށް ފަށައި، މުޅި ރާއްޖެއިން ވިޔަފާރި އުސޫލުން ދަނޑުވެރިކަން ކުރާ 39 ފަރާތަކުން މި ބޯހިމެނުމުގައި ބައިވެރިވަމުން އަންނަ ކަމަށް މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްއިން ހާމަކޮށްފިއެވެ.
މިއީ އެ މިނިސްޓްރީއާއި، މޯލްޑިވްސް ބިއުރޯ އޮފް ސްޓެޓިސްޓިކްސް (އެމް.ބީ.އެސް) އަދި އދ. ގެ ފުޑް އެންޑް އެގްރިކަލްޗަރ އޯގަނައިޒޭޝަން (އެފް.އޭ.އޯ) ގުޅިގެން ކުރިއަށްގެންދާ ގައުމީ ފެންވަރުގެ މުހިންމު ހަރަކާތެކެވެ.
.png&w=750&q=75)
Ad by Hajj Corporation
މިނިސްޓްރީން ބުނި ގޮތުގައި، ރާއްޖޭގެ ތާރީޚުގައި އަލަށް ކުރިއަށްގެންދާ މި ބޯހިމެނުމުގެ މައިގަނޑު މަގުސަދަކީ ދަނޑުވެރިކަމުގެ ދާއިރާއާ ގުޅޭ މުހިންމު ތަފާސްހިސާބުތަކާއި މައުލޫމާތު އެއްކުރުމެވެ. އަދި މިއީ ރާއްޖޭގެ ކާބޯތަކެތީގެ ރައްކާތެރިކަމަށް (ފުޑް ސެކިއުރިޓީއަށް) ހުރި ގޮންޖެހުންތަކާއި އުނިކަންކަން ދެނެގަތުމަށް އެޅޭ ވަރަށް މުހިންމު ބިންގަލެއްގެ ގޮތުގައި އެ މިނިސްޓްރީން ފާހަގަކުރެއެވެ.
މީގެ އިތުރުން، މި ބޯހިމެނުމުން ލިބޭ ހޯދުންތަކުގެ އަލީގައި، ތަފާސްހިސާބުގެ މައްޗަށް ބިނާކޮށް ދަނޑުވެރިކަމުގެ ސިޔާސަތުތައް އެކުލަވާލުމަށް މަގުފަހިވެގެންދާނެއެވެ. އަދި ދަނޑުވެރިކަމުގެ އުފެއްދުންތެރިކަން އިތުރުކުރުމަށާއި، ދެމެހެއްޓެނިވި ގޮތެއްގައި މި ދާއިރާ ތަރައްގީކޮށް ގައުމީ ފެންވަރުގައި ކާބޯތަކެތީގެ ޔަގީންކަން ކަށަވަރުކުރުމަށް އަޅަންޖެހޭ ފިޔަވަޅުތައް އެޅުމަށް މި މައުލޫމާތުތަކުގެ ބޭނުން ހިފާނެ ކަމަށްވެސް މިނިސްޓްރީން މައުލޫމާތުދެއެވެ.

-01.jpg&w=3840&q=75)
