ވިލިމާލެ ހޮސްޕިޓަލުގައި ދަތުގެ ފަރުވާގެ ހިދުމަތް ރަސްމީކޮށް ފަށައިފި އެވެ.

މި ހިދުމަތް ފެށުމަށް ބޭއްވި ރަސްމިއްޔާތުގައި ހެލްތު މިނިސްޓަރު އަބްދުﷲ ނާޒިމް އިބްރާހިމް އާއި ދަރުމަވަންތަ ހޮސްޕިޓަލްގެ ސީއީއޯ އިބްރާހީމް ރައްޒާޤް ހަލީމްގެ އިތުރުން ހެލްތާއި، އެ ހޮސްޕިޓަލްގެ އިސްވެރިން ބައިވެރިވިއެވެ.

ވިލިމާލެ ހޮސްޕިޓަލުގައި މުޅިން އަލަށް ދަތުގެ ފަރުވާގެ ޚިދުމަތް އިފްތިތާހުކުރުމަށް ބޭއްވި ހަފްލާގައި މިނިސްޓަރު ނާޒިމް ދެއްކެވި ވާހަކާގައި ވިދާޅުވީ، ރައީސް ޑރ. މުހައްމަދު މުޢިއްޒު ފައްޓަވާފައިވަނީ ސިއްޙީ ޚިދުމަތުގެ ތާރީޚުގެ މުޅިން އައު ސަފުހާއެއް ކަމަށެވެ.

ވިލިމާލޭގައި އަޅާ 100 އެނދުގެ އައު ހޮސްޕިޓަލުގެ އެންމެ ފަހުގެ މައުލޫމާތު ހިއްސާކުރަމުން މިނިސްޓަރު ވިދާޅުވީ، އެ ހޮސްޕިޓަލުން ދެމުންދާ ޚިދުމަތްތައް ބަދަލުކުރާނެ ތަން މިހާރު ނިންމަވާފައިވާކަމަށެވެ. އަދި އެތަނަށް ހިނގާނެ ޚަރަދުތައް ހޯދުމުގެ ކަންކަން ކުރިއަށްދާ ކަމަށް ވިދާޅުވިއެވެ.މިނިސްޓަރު ނާޒިމް ވަނީ ވިލިމާލެ ހޮސްޕިޓަލުގެ މަސައްކަތް ވަރަށް އަވަހަށް ފެށިގެންދާނެ ކަމަށް ވެސް ވިދާޅުވެފައެވެ.