ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ދަރިވަރުންގެ ޔުނިއަނުން އިންތިޒާމްކޮށްގެން ބާއްވާ ފުޓްސަލް ފިއެސްޓާ މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރިޔަމް މާރިޔާ ފަށްޓަވައިދެއްވައިފިއެވެ.

މި މަހުގެ 24 ވީބުރާސްފަތި ދުވަހުގެ ރޭ ރެހެންދި ސްކޫލްގެ ދެކުނުން އޮންނަ ފުޓްސަލް ދަނޑުތަކުގައި ބޭއްވުނު ހުޅުވުމުގެ ރަސްމިއްޔާތާއި، ޝީލްޑް މެޗްގެ ޝަރަފްވެރި މެހްމާނެއްގެ ހައިސިއްޔަތުން މިނިސްޓަރ ވަނީ ބައިވެރިވެ ވަޑައިގަތްފައެވެ.

މި މުބާރާތުގައި ޔުނިވަރސިޓީތަކާއި ކޮލެޖްތަކުން މިއަހަރު 30 ޓީމު ވަނީ ބައިވެރިވެފައެވެ. އެއީ އަންހެން ޑިވިޝަންގެ 12 ޓީމާއި ފިރިހެން ޑިވިޝަންގެ 18 ޓީމު. މުބާރާތް ހިނގަމުންދާނީ 24 އޮކްޓޫބަރުން 10 ނޮވެންބަރުގެ ނިޔަލަށެވެ.

މަތީ ތަޢުލީމު ދޭ މުއައްސަސާތަކުގެ މުވައްޒަފުންނާ ތައުލީމު ޙާޞިލުކުރަމުންދާ ދަރިވަރުންނާއި އިދާރީ މުވައްޒަފުންގެމެދުގައި އިޖްތިމާޢީ ރޫހާއި ގުޅުން ގާއިމުކޮށް އާލާކުރުމަށް ސިލްސިލާގޮތެއްގައި ބާއްވާ މި މުބާރާތަށް ކޮންމެއަހަރުވެސް އާންމުންގެ ސަމާލުކަން ވަރަށް ބޮޑުކަން ފާހަގަކުރެވެއެވެ.