12 ރަށެއްގައި 2.5 މެގަވޯޓުގެ ސޯލާއިން ހަކަތަ އުފައްދާ ނިޒާމު ޤާއިމުކޮށްފިއެވެ.

މީގެ އިތުރުން 5 ރަށެއްގައި ޖުމްލަ 1.9 މެގަވޮޓްގެ އަވަރ ބެޓަރީ އެނަރޖީ ސްޓޯރޭޖް ސިސްޓަމްވެސް ވަނީ ޤާއިމު ކޮށްފައެވެ.

މިވީ 11 މަސްދުވަހުގެތެރެގައި 32 ރަށެއްގައި ހަކަތައާގުޅޭ އެކި މަސައްކަތްތައް ނިންމާލެވިފައިވާކަމަށް މޫސުމީ ބަދަލުތަކާއި ތިމާވެއްޓާ ހަކަތައާއި ބެހޭ ވުޒާރާއިން ވަނީ ވިދާޅުވެފައެވެ. އެގޮތުން ބައެއް ރަށްރަށުގައި ކަރަންޓު ކެނޑުމުގެ މަސައްކަތްވަނީ ބޮޑުވެފައެވެ. މިކަން ޙައްލުކުރުމަށް ސަރުކާރުދަނީ ހަކަތައާ ގުޅުންހުރި އެކި ޚިދުމަތްތައް ހަރުދަނާކުރުމުގެ މަސައްކަތް ކުރަމުންނެވެ.

ހަކަތައިގެ މަޝްރޫޢު ފުޅާކުރުމަށް ގޭބިސީތަކަށް ޚާއްސަކޮށްގެން "މަގޭ ސޯލާ"ގެ ނަމުގައި މަޝްރޫޢުއެއްވަނީ ފައްޓަވާފައެވެ. އެކި ފިޔަވަހިތަކަށް ބަހާލައިގެން ކުރިއަށްގެންދާ މިމަޝްރޫޢުގެ ދަށުން ފުރަތަމަ މަރުޙަލާގައި ހޯދާ 3 މެގަވޮޓްގެ ސޯލާ ޕީވީ ހޯދުމަށް މިހާރުވަނީ ކޮންޓްރެކްޓަރަކާ ހަވާލުކޮށްފައެވެ.

ހަމަ މިމަޝްރޫޢުގެ ދަށުން އިތުރު 7 މެގަވޮޓްގެ ސޯލާ ޕީވީ ސިސްޓަމް ހޯދުމުގެ މަސައްކަތްވެސްދަނީ ކުރަމުންނެވެ.

ހަމައެއާއެކު ސޯލާއިން އިޔާދަކުރަނިވި ހަކަތަ އުފެއްދުމަށް ކުރާ މަސައްކަތް ފުޅާކޮށް ވަޔާއި ކަނޑުގެ އޮއެ ބޭނުންކޮށްގެން ހަކަތަ އުފެއްދުމަށްޓަކައި ދިރާސާކުރުމުގެ މަސައްކަތްދަނީ ކުރަމުންނެވެ. ހަމައެއާއެކު ރަށްރަށުގައި ހަކަތައިގެ ގިނަ މަޝްރޫޢުތަކެއް ފެށުމަށްވެސް ދަނީ ތައްޔާރުވަމުންނެވެ.