އިންޑިއާގެ އެއާލައިންތަކަށް މި މަހު ދިން އެތައް ސަތޭކަ ހަގީގަތެއްނެތް ބޮމުގެ އިންޒާރުތަކެއްގެ ސަބަބުން އިންޑިއާގެ ވައިގެ ދަތުރުފަތުރުގެ ދާއިރާ ހަލަބޮލިވެ ގައުމީ ސަލާމަތަށް ނުރައްކާވާ ފަދަ ބިރުވެރިކަން އުފެދިއްޖެއެވެ.

އިންޑިގޯ، އަކާސާ އަދި އެއާ އިންޑިއާ ފަދަ އެއާލައިންތަކަށް ބޮމުގެ އިންޒާރުދީފައިވާއިރު، އިންޑިގޯއަށް ހަތަރު ދުވަހުގެ ތެރޭގައި ގާތްގަނޑަކަށް ތިރީހަކަށް އިންޒާރު ލިބިފައިވެއެވެ.

އިންޑިއާ ސަރުކާރުން ބުނީ ބޮމެއް އޮތް ކަމަށް ބުނެ އެއާލައިންތަކަށް ދޭ އިންޒާރުތައް ނުރައްކާ ދަރަޖައަށް އިތުރުވެފައިވާ ކަމަށާއި، އެފަދަ އިންޒާރުތަކަކީ ދޮގު މައުލޫމާތު ކަމަށެވެ. އަދި އެއީ ދޮގެއްކަން އެނގުމުން އަވަހަށް ސޯޝަލް މީޑިއާ ޕްލެޓްފޯމުތަކުން އެ ޚަބަރު ނެގުމަކީ ޕްލެޓްފޯމުތަކުގެ ޒިންމާއެއް ކަމަށް އިންޑިއާ ސަރުކާރުން ބުނެއެވެ. އަދި އެގޮތަށް އެ ޒިންމާ އަދާނުކުރާނަމަ، ގާނޫނުތަކުގެ ދަށުން ކަނޑައަޅާފައިވާ ގޮތުގެ މަތިން ފިޔަވަޅު އަޅާނެ ކަމަށް ސަރުކާރުން ބުނެފައިވެއެވެ.

އޮކްޓޯބަރު މަހުގެ 31 ވަނަ ދުވަހު އިންޑިޔާގައި ފާހަގަކުރާ ބަންދަކާ ދިމާކޮށް ހަލަބޮލިކަމެއް އުފެދި، އެތައް މިލިއަން ދަތުރުވެރިންނަށް އޭގެ އަސަރު ކުރާނެކަމަށް ބެލެވެއެވެ.

ސަރުކާރުން ބުނީ އެފަދަ އިންޒާރުތައް ދޭ މީހުން ދެނެގަނެ، ކުށަށް ދިގު މުއްދަތަކަށް ހުކުމް ކުރެވޭނެ ގޮތަށް އޭވިއޭޝަން އަދި އެއާކްރާފްޓް ސެކިއުރިޓީ ގާނޫނުތައް ބަދަލު ކުރުމަށް މަޝްވަރާ ކުރަމުން އަންނަ ކަމަށެވެ.

ޕްރެސް ޓްރަސްޓް އޮފް އިންޑިއާ (ޕީޓިއައި) ނޫސް އޭޖެންސީގެ މައުލޫމާތުތަކުން ދައްކާ ގޮތުގައި އޮކްޓޯބަރު މަހުގެ މެދުތެރެއިން ފެށިގެން ގާތްގަނޑަކަށް 275 ބޮމުގެ އިންޒާރު ދީފައިވެއެވެ. އިންޑިއާގެ އެހެން މީޑިއާތަކުން ބުނާ ގޮތުގައި އެ ފަދަ އިންޒާރުތަކުގެ އަދަދު ގާތްގަނޑަކަށް 400 އަށް ވުރެ އިތުރުވާނެއެވެ.