ރީތި ގަހަށް ގެއްލުންވާ ގޮތަށް ފުޑް ކިއޯސްކެއް ހަދަން ދެކޮޅުކަން ކުރީގެ ހެރިޓޭޖު މިނިސްޓަރު ޔުމްނާ މައުމޫނު ހާމަކުރައްވައިފިއެވެ.

ކުރީގެ މިނިސްޓަރ މިކަން ހާމަކުރެއްވީ ކިއަދު އެކްސްގައި ކުރެއްވި ޕޯސްޓެއްގައެވެ.

ޔުމްނާ ވިދާޅުވީ ދާރުލް އާސާރު ޢިމާރާތް ކުރިމަތީގައި ހުރި، 200 އަހަރަށްވުރެ ގިނަ ދުވަސްވެފައިވާ، ރައްކާތެރިކުރެވިފައިވާ، ރީތި ގަހަށް ގެއްލުން ލިބޭ ގޮތަށް އެއްވެސް މަސައްަތެއް ކުރުމަކީ ކުރެވިގެންވާނެ ކަމެއް ނޫންކަމަށެވެ. އަދި ހަމަ އެހެންމެ ޤައުމީ ދާރުލް އާސާރުހުރި ޢިމާރާތުގެ ކުރިމަތީ ކެފޭ އެއް ހެދުމުން ތަނުގެ ހައިބަތު ގެެއްލި، މަންޒަރު ހުތުރުވާ ކަމަށް ގަބޫލުކުރައްވާކަމަށްވެސް ޔުމްނާ ވިދާޅުވިއެވެ.

ގައުމީ ދާރުލް އާސާރު ކުރިމަތީގައި އޮންނަ ކުޑަ ހިއްތަން މައިޒާނުގައި ހުންނަ ހިމާޔަތްކޮށްފައިވާ ރީތި ގަހަށް ގެއްލުންވާ ގޮތަށް ފުޑް ކިއޯސްކެއް ހަދާތީ އެ އިމާރާތް ހެދުން ހުއްޓާލުމަށް މާލޭ ސިޓީ ކައުންސިލުންވެސްވަނީ އަންގައިފައެވެ.މި މަސައްކަތް އެ ސަރަހައްދުގައި ކުރަމުންދަނީ ހުއްދަ ނުހޯދާ ކަމަށް ވާތީ މިހާރު އެ މަސައްކަތް އެންވަރަމެންޓަލް ޕްރޮޓެކްޝަން އެޖެންސީއިންވެސް ވަނީ ހުއްޓުވާފައެވެ. ފުޑް ކިއޯސްކެއް ހެދުމަށްޓަކައި އެ ގަސް ވަށައިގެން ސަތަރި ޖަހައި ބަންދުކޮށްފައިވާއިރު ގަހަށް ގެއްލުންވާގޮތަށް އަމަލުކުރަމުން އަންނަކަމަށް ބުނެ ގިނަ ފަރާތްތަކަކުންވަނީ ކަންބޮޑުވުން ފާޅުކޮށްފައެވެ.މިކަމާ ގުޅިގެން މާލޭގެ މޭޔަރު އާދަމް އާޒިމް މެންދުރު ޓީވީއަށް ވިދާޅުވީ ދެ ގަރުނުވީ ރީތި ގަހަށް ގެއްލުންވަމުން ދާގޮތަށް އިމާރާތްކުރަމުން އަންނާތީ އެކަން ހުއްޓާލުމަށް އަންގާފައިވާނެކަމަށެވެ.