މާލޭގެ މަގުތަކުގައި ހުރި ގިނަދުވަސްވެ ބާވެފައި ހުރި އުޅަނދުތައްނެގުމުގެ މަސައްކަތް ފަށައިފިއެއެވެ.

މިއަދު ހެނދުނު ފެށި މި މަސައްކަތުގައި ހަރަކާތްތެރިވަނީ މާލެ ސިޓީ ކައުންސިލް އިދާރާއާއި ފުލުހުންގެ މުއައްސަސާ ގުޅިގެންނެވެ.

އެގޮތުން މާލޭގެ ގިނަ މަގުތަކުގައި ހުރި އުޅަނދުތައް މިހާރުވަނީ ނަގާފައެވެ. ފުލުހުން ހާމަކުރިގޮތުގައި ގިނަ ދުވަސްވެ ހަލާކުވެފައި ހުންނަ މިފަދަ އުޅަނދުތަކުގެ ސަބަބުން މަގުމަތި ބޭނުންކުރާ ފަރާތްތަކަށް އޭގެ އުނދަގޫ ފޯރާކަމަށެވެ. އަދި މާލޭއަކީ ޖާގައިގެ ދަތިކަން ބޮޑު ތަނަކަށް ވުމުން މިފަދަ ކަންކަމަށް ރައްޔިތުން ސަމާލުކަން ދިނުމަށް ވެސް ފުލުހުންގެ އިދާރާއިން ވަނީ އިލްތިމާސްކޮށްފައެވެ.

މި މަސައްކަތުގައި ސިޓީ ކައުންސިލުން ބައިވެރިވިނަމަވެސް ޓޯ ކުރާނީ ކޮން އުޅަނދުތަކެއްކަން ކަނޑައަޅާނީ ފުލުހުންގެ މުއައްސަސާއިން ކަމަށް ކައުންސިލުން ވަނީ ހާމަކޮށްފައެވެ.

އަދި ފުލުހުން އަމަލުކުރާނީ ޤަވާއިދަކީ އާއްމު އުސޫލުން ނައްތާލާ އަދި ޓޯކުރާ އުޅަނދުތަކާއި މެދު އަމަލުކުރަން ގާނޫނުގައި ކަނޑައަޅާފައި އޮންނަ އުސޫލުގެ ދަށުންކަމަށް ފުލުހުން ވަނީ ވިދާޅުވެފައެވެ. ނަމަވެސް ފުލުހުންގެ ބެލުމުގެ ދަށަށް ގެންދާ އުޅަނދުތައް ނައްތާލުމުގެ ކުރިން އެތަކެތީގެ ވެރިންނަށް އަންގާނެ ކަމަށާއި ވަކި މުއްދަތެއްގެ ތެރޭގައި ޖަވާބެއް ނުލިބޭނަމަ އެތަކެތި ފުލުހުންގެ އިދާރާއިން ނައްތާލާނެ ކަމަށް ވެސް އެ އިދާރާއިން ވަނީ ބުނެފައެވެ.

އަދި މިކަމުގައި ޢަމަލުކުރާނީ ގާނޫނުގައި މިކަމަށް ކަނޑައަޅާފައިވާ އުސޫލުތަކުގެ މަތިން ކަމަށް ވެސް ފުލުހުން ވަނީ ހާމަކޮށްފައެވެ.