ކަނޑުގެ ރާޅުން ހަކަތަ އުފެއްދުމަށް ކަރަންޓް ކުންފުނި- ސްޓެލްކޯ އިން ދިރާސާ މަޝްރޫއެއް ފަށައިފިއެވެ.

މިކަމާ ގުޅިގެން އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ މިއީ ރާއްޖޭގެ ހަކަތައިގެ 33 އިންސައްތައަކީ އިޔާދަކުރަނިވި ހަކަތައަށް ހެދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅު ފުއްދެވުމަށް ފެށިގެންދިޔަ މަޝްރޫއެއްކަމަށެވެ. މިއީ އިރުގެ އަލި ފިޔަވައި އިޔާދަކުރަނިވި ހަކަތަ އުފެއްދޭނެ އިތުރު ގޮތްތައް ހޯދުމުގެ އަމާޒުގައި ފެށި ދިރާސާއެކެވެ.

އެމްޑީ ފަހުމީ ވަނީ މޫސުމާއެކު އިރުގެ އަލިން ހަކަތަ އުފެއްދުމަށް އަސަރުކުރި ނަމަވެސް ރާޅުން ހަކަތަ އުފެއްދުމަށް އެގޮތުން ކުރާ އަސަރު ކުޑަވާނެކަން ފާހަގަކުރައްވައި ރާޅުން ހަކަތަ އުފެއްދުމުގެ ފަސޭހަތައް ވިދާޅުވެދެއްވާފައެވެ. ސްޓެލްކޯގެ އަމާޒަކީ ރާޅު ހަކަތަ މިހާރު ހުރި އިއާދަކުރަނިވި ހަކަތަ ފުރިހަމަ ކުރެވޭނެ ގޮތްތައް ބަލައި މިހާރަށްވުރެ ވަރުގަދަ އަދި އިތުބާރު ހުރި ހަކަތަ ގްރިޑެއް އުފެއްދުން ކަމަށް ފަހުމީ ވިދާޅުވިއެވެ.

ރާއްޖޭގައި އިއާދަކުރަނިވި ހަކަތައިން 33 ޕަސެންޓު ކަރަންޓު އުފެއްދުމަށް 1.3 ބިލިއަން ޑޮލަރު ބޭނުންވާ ކަމަށާއި އޭގެތެރެއިން މިހާތަނަށް ހިލޭ އެހީއަށް ހަމަޖެހުނީ 13 ޕަސެންޓު ކަމަށް މަރުކަޒީ ބޭންކް، (އެމްއެމްއޭ)ގެ ގަވަރުނަރު އަހުމަދު މުނައްވަރު ވިދާޅުވެފައިވަނީ ވޯލްޑް ބޭންކް އަދި އައިއެމްއެފްގެ އަހަރީ ބައްދަލުވުމުގައި ތަގުރީރު ކުރައްވަމުންނެވެ.

މުނައްވަރު ވިދާޅުވީ، މޫސުމަށް އަންނަ ބަދަލުތަކުގެ އެންމެ ބޮޑު އަސަރެއް ކުރަނީ ރާއްޖެ ފަދަ ކުދި ގައުމުތަކަށް ކަމަށާއި އެ ބަދަލުތަކުން އަރައިގަތުމަށް މަސައްކަތްތަކެއް ކުރަމުން އަންނަ ކަމަށެވެ.