އިސްރާއީލުން ހިފާފައިވާ ފަލަސްތީނުގެ ބިންތަކުން އިސްރާއީލު ސިފައިން ފޭބުމަށާއި، އެއީ ސުލްހަ ގާއިމުކުރުމަށް ކަނޑައަޅަންޖެހޭ ޝަރުތެއް ކަމަށް އަރަބި އަދި މުސްލިމު ލީޑަރުން ގޮވާލައްވައިފިއެވެ.

ލީޑަރުން މިކަމަށް ގޮވާލައިފައި ވަނީ ސައުދި އަރަބިއްޔާގެ ވެރިރަށް ރިޔާދުގައި ހޯމަ ދުވަހު ބޭއްވި ބައްދަލުވުމުގައެވެ.

އަރަބި ލީގް އަދި އިސްލާމިކް ކޯޕަރޭޝަންނުން ބޭއްވި މި ބައްދަލްވުމަކީ އިސްރާއީލުގެ އަނިޔާވެރިކަން ކުށްވެރިކޮށް ގައުމުތަކުން އެއްތަންވެ ފުޅާ ދާއިރާއެއްގައި މަޝްވަރާކުރި ފުރަތަމަ ފަހަރެވެ.

57 އަރަބި ގައުމަކުން ބައިވެރިވި މި ސަމިޓްގައި މައިގަނޑު ގޮތެއްގައި ވަނީ އިރުމަތީ ގުދުސް ފަލަސްތީނުގެ ވެރި ރަށަށް ހަދައި ފަލަސްތީނުގެ މިނިވަން ދައުލަތެއް ގާއިމުކުރުމަށް ގޮވާލައްވާފައެވެ. އަދި އެކަން ހާސިލް ކުރުމަށް ވަކި ފިޔަވަޅުތަކާއި ޓައިމްލައިންތަކާއެކު ބައިނަލްއަގްވާމީ ގޮތުން ސްޕޮންސާ ކުރާ ޕްލޭނެއް އެކުލަވާލައި ތަންފީޒުކުރަން ފަށަން ޖެހޭ ކަމަށް ވެސް ވަނީ މަޝްވަރާކޮށްފައިއެވެ.

މިދިޔަ އަހަރު އޮކްޓޫބަރު ހަތްވަނަ ދުވަހު ނަސްލު ނައްތާލުމުގެ މަގުސަދުގައި އިސްރާއީލުން ޣައްޒާއަށް ދޭންފެށި ހަމަލާތަކުގައި މިހާތަނަށް 43،600 އަށްވުރެ ގިނަ މީހުން ވަނީ ޝަހީދުކޮށްލާފައެވެ.