ފަލަސްތީނު މިނިވަންކުރުމަށްޓަކައި އިސްރާއީލާ ދެކޮޅަށް ފަނާކުރަނިވި ދިގުލީ ހަނގުރާމައަކަށް ދިޔުން ނޫން އެހެން ގޮތެއް ނެތް ކަމަށް ހަމާސް ޖަމާއަތުގެ ވެރިޔާ ޔަހްޔާ އައްސިންވާރު ވިދާޅުވެއްޖެއެވެ.

އަރަބި ތިން ވެރިއަކަށް ފޮނުއްވި ސިޓީފުޅެއްގައި ސިންވާރު ވިދާޅުވެފައިވަނީ، އާންމު ގޮތެއްގައި ގައުމުތަކުން އިސްތިއުމާރާ ދެކޮޅަށް ކުރާ މިނިވަންކަމުގެ ހަނގުރާމައަކީ ފަނާކުރަނިވި ދިގުލީ ހަނގުރާމައެއް ކަމަށާއި އަނިޔާވެރި އިސްތިއުމާރީ ބާރުތަކުގެ އަތްދަށުން ގިނަ ގައުމުތަކަށް މިނިވަންކަން ލިބިފައިވަނީ ދިގުލީ ހަނގުރާމައެއްކޮށްގެން ކަމުގައެވެ.

ފަލަސްތީނު މިނިވަންކުރުމަށް މުޖާހިދުން ގެންގުޅޭ މައިގަނޑު ސްޓްރެޓެޖީއަކީ ފަލަސްތީނުގެ ބިމަށް ވެރިވެގަނެގެން އިސްރާއީލަށް އަމާންކަމުގައި ނޯވެވުމެވެ. މި ސްޓްރެޓެޖީގެ ސަބަބުން މުޖާހިދުންގެ ހަމަލާތަކުގެ ސަބަބުން އިސްރާއީލުގައި ވަނީ އަމާންކަން އެއްކޮށް ގެއްލިފައެވެ. މިކަމުގެ ސަބަބުން އިސްރާއީލުގެ ޔަހޫދީން ވަނީ އެ މީހުން ހިޖުރަކޮށްގެން އުޅޭ ފަލަސްތީނުގެ ބިން ދޫކޮށް އެ މީހުންގެ އަމިއްލަ ގައުމުތަކަށް އެނބުރި ދާން ފަށާފައެވެ.

ސިންވާރު ވިދާޅުވެފައިވަނީ، މިކަމުގެ އަގު ކިތަންމެ ބޮޑު ނަމަވެސް އަދި އެތައް ލައްކައަކުން އާންމުން މަރުވި ނަމަވެސް އިސްރާއީލުގެ އަޅުވެތިކަމުން ފަލަސްތީނުގެ ރައްޔިތުންނަށް މިނިވަންވެވޭނީ ދިގުލީ ހަނގުރާމައެއް ކޮށްގެން ފަލަސްތީނުން ފައިބަން ޔަހޫދީންނަށް މަޖުބޫރުކޮށްގެން ކަމަށާއި އެއީ ކުރެވޭނެ ކަމެއް ކަމަށެވެ.

މުޖާހިދުންނާއި ޣައްޒާގެ ރައްޔިތުންގެ ވެސް ޝިއާރަކީ މިނިވަންކަން ހޯދުން ނޫނީ މިނިވަންކަމަށް މަސައްކަތްކޮށް ޝަހީދު ވެގެންދިޔުން ކަމަށް ބުނެއެވެ. އަދި ފަލަސްތީނު ރައްޔިތުންގެ މިނިވަންކަމުގެ ރޫހާއި އަޒުމު ގުޑުވާލުމުގައި އިސްރާއީލުން ވަނީ ނާކާމިޔާބުވެފައި ކަމަށް މުޖާހިދުން ބުނެއެވެ.