ފަލަސްތީނުގައި ހިންގަމުންދާ ނަސްލު ނައްތާލުމުގެ ޢަމަލުތަކާ ގުޅިގެން ދެކުނު އެފްރިކާއިން އިސްރާއީލާ ދެކޮޅަށް، ބައިނަލްއަގުވާމީ ކްރިމިނަލް ކޯޓު (އައިސީޖޭ)އަށް ހުށަހެޅި މައްސަލައިގައި ރާއްޖެއިން ބައިވެރިވެއްޖެއެވެ.

އެކަން އިއުލާނުކޮށް، ބަންޑާރަ ނައިބުގެ އޮފީހުން މިއަދު ނެރުނު ނޫސް ބަޔާނެއްގައި ބުނީ، ރާއްޖެއިން އެ މައްސަލައިގައި ބައިވެރިވުމަށް ހުށަހަޅަންޖެހޭ "ޑެކްލެރޭޝަން އޮފް އިންޓަވެންޝަން" މިއަދު ބަންޑާރަ ނައިބު އަޙްމަދު އުޝާމުގެ ފަރާތުން އައިސީޖޭއަށް ހުށަހަޅާފައިވާ ކަމަށެވެ.

އެ މައްސަލައިގައި ރާއްޖޭގެ ހުށަހެޅުން ބިނާކޮށްފައިވަނީ، ޖެނޮސައިޑް ކޮންވެންޝަންގެ ދަށުން "އިންސައިޓްމަންޓް ޓު ކޮމިޓް ޖެނޮސައިޑް" އަދި "ޑިއުޓީ ޓު ޕަނިޝް ދަ އިންސައިޓްމަންޓް އޮފް ޖެނޮސައިޑް" މާނަކޮށްފައިވާ ގޮތާ ގުޅޭގޮތުން ކަމަށް ވެސް އެ އޮފީހުން ބުންޏެވެ.

ދެކުނު އެފްރިކާއިން އިސްރާއީލާ ދެކޮޅަށް އައިސީޖޭއަށް އެ މައްސަލަ ހުށަހެޅި މިދިޔަ އަހަރުގެ ޑިސެމްބަރު މަހުގެ 29 ވަނަ ދުވަހުއެވެ. އެ މައްސަލައިގައި ދެކުނު އެފްރިކާއިން ހުށަހަޅާފައިވަނީ، އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ޣައްޒާގައި ހިންގަމުންދާ ލާއިންސާނީ ޢަމަލުތަކަކީ، 1948 ވަނަ އަހަރު ކަނޑައަޅާފައިވާ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް (ޖެނޮސައިޑް ކޮންވެންޝަން) އާ ޚިލާފު ޢަމަލުތަކެއްކަމަށް ކަނޑައަޅައި ދިނުމަށެވެ.

އެ މައްސަލައަށް ރާއްޖޭގެ އިތުރުން މެލޭޝިއާ، މިސްރު، ތުރުކީ، އުރުދުން، ބޮލީވީއާ، ނަމީބިއާ، ޕާކިސްތާނު، ކޮލަމްބިއާ، ބްރެޒިލް އަދި އަރަބި ލީގުގައި ހިމެނޭ 22 ގައުމު ވެސް ވަނީ ބައިވެރިވެފައެވެ. އަދި އިސްލާމީ ގައުމުތަކުގެ އޯގަނައިޒޭޝަން (އޯއައިސީ)އިން ވެސް އެ މައްސަލައިގައި ދެކުނު އެފްރިކާއާ ބައިވެރިވުމަށް ވެސް ނިންމާފައެވެ. އެ ޖަމިއްޔާގައި މެދުއިރުމަތީގެ ބޮޑެތި ގައުމުތައް ކަމުގައިވާ ސައުދީ، އީރާން އަދި މޮރޮކޯ ފަދަ ގައުމުތައް ހިމެނެއެވެ.

އެ މައްސަލަ ހުށަހެޅި ނަމަވެސް، މިއަދާ ހަމައަށް ވެސް އިސްރާއީލުން ފަލަސްތީނުގައި ހިންގާ ޖަރީމާތައް ހުއްޓާފައެއް ނުވެއެވެ. އެގޮތުން މިހާތަނަށް އިސްރާއީލުން ވަނީ ފަލަސްތީނުގެ 41،000 އަށް ވުރެ ގިނަ މީހުން ޝަހީދުކޮށް، މުޅި ޣައްޒާ ފުނޑުފުނޑުކޮށްލާފައެވެ.