ޑޮލަރުގެ ދަތިކަން ހައްލު ކުރުމަށް ބައެެއް ގާނޫނުތަކަށް އިސްލާހް ގެންނާނެ ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ.

ރައީސް އޮފީހުން މިއަދު ކުރިއަށް ގެންދިޔަ ނޫސްވެރިންގެ ބައްދަލުކުރެއްވުމުގައި ބަންޑާރަ ނައިބް އަހުމަދު އުޝާމް ވިދާޅުވީ، ރާއްޖެއަށް މިހާރު ދިމާވެފައިވާ އިގްތިސާދީ ހާލަތުން އަރައިގަތުމަށް ސަރުކާރުން ވަރަށް ބުރަ މަސައްކަތްތަކެއް ކުރަމުންދާ ކަމަށާއި، އެކަން ހައްލުކުރުމަށްޓަކައި ބައެއް ގާނޫނުތަކަށް ބަދަލު ގެންނަން މަޝްވަރާކޮށް، އެކަމަށް ގޮތްތަކެއްވެސް ނިންމާފައިވާ ކަމަށެވެ.

އެހެންކަމުން ސަރުކާރުގެ ޑޮލަރު ރިޒާވް އިތުރު ކުރަން ބައެއް ގާނޫނުތައް އިސްލާހުކޮށް، ބައެއް ޓެކްސްތައް ޑޮލަރުން ދައްކަން ޖެހޭ ގޮތް ހަދަން ކެބިނެޓުން މިހާރު ވަނީ ނިންމައިފައެވެ. އަދި މީރާ އަށް ލިބޭ އާމްދަނީ މިހާރަށް ވުރެ ބޮޑަށް އިތުރުކޮށް، މީރާގެ ގަވައިދުތަކަށް ނޫނީ ގާނޫނަށް ގެންނަން ޖެހޭ ބަދަލުތައް ގެންނަން ޖެހޭ ނަމަ، އެކަން ކުރުމަށް ނިންމާފައިވާ ކަމަށް ވެސް އުޝާމް ވިދާޅުވިއެވެ.

"ޑޮލަރުން އިންކަމް ލިބޭ، ޑޮލަރުން އާމްދަނީ ލިބޭ ކުންފުނުނިތަކުން ދައުލަތައް ފައިސާ ދައްކާ އިރުގަ މިހާރު ބައެެއް ހާލަތްތަކުގަ އެބަ ރުފިޔާއިން ފައިސާ ދައްކާ، މިސާލަކަށް ކޯޕަރޭޓް އިންކަމް ޓެކްސް ފަދަ ކުންފުނިތަކުން މީރާ އައް ފައިސާ ދައްކަނީ ދިވެހި ރުފިޔާއިން.އެހެން ނަމަވެސް ސަރުކާރުން ގާނޫނު ތަކުން އަދި ގަވާއިދު ތަކައް ގެންނަން ޖެހޭ އިސްލާހުތަށް ގެނެސް އަޅުގަނޑުމެން މިކަން ބަދަލު ކުރާނަން" ބަންޑާރަ ނައިބް އަހުމަދު އުޝާމް ވިދާޅުވިއެވެ.

ބަންޑާރަ ނައިބު ވިދާޅުވީ ޑޮލަރުން އާމްދަނީ ލިބޭ ކުންފުނިތަކުން ކޯޕަރޭޓް އިންކަމް ޓެކްސް އާއި، އިމްޕޯޓު ޓެކްސް ޑޮލަރުން ދައްކާ ގޮތަށް ގާނޫނުތަކަށް ބަދަލު ގެންނާނެ ކަމަށާއި އަދި ޑޮލަރުން މުސާރަ ދޭ ކުންފުނިތަކުން ޕެންޝަން ވެސް ޑޮލަރުން ދައްކަން ޖެހޭ ގޮތަށް ޕެންޝަން ގާނޫނަށް ބަދަލު ގެންނަން ނިންމާފައިވާ ކަމަށެވެ.

މީގެ އިތުރުން ކެބިނެޓުން ނިންމެވި ކަންތައްތައް މަޖިލީހަށް ހުށަހަޅާ ކުރިޔައް އޮތް ހަފްތާއެއް ތެރޭގައި އެކަމަށް އަމަލު ކުރަން ފަށާނެ ކަމަށްވެސް އުޝާމް ވިދާޅުވިއެވެ.

ޑޮލަރުގެ ދަތިކަން ހައްލުކުރުމަށް ބައެއް ގާނޫނުތަކަށް ބަދަލު ގެނައުމުގެ މަސައްކަތް ސަރުކާރުން ފަށާފައިވާޢިރު، ބީއެމްއެލްގެ ރުފިޔާ އެކައުންޓުތަކަށް ދޫކޮށްފައިވާ ޑެބިޓް އަދި ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތް ނުކުރެވޭ ގޮތަށް މިއަދު ހެދިއެވެ. އެހެން ނަމަވެސް އެމްއެމްއޭގެ ލަފާގެ މަތިން ބީއެމްއެލުން ވަނީ އެ ނިންމުން ބާތިލުކޮށްފައެވެ.