އިޒްރޭލް ޕާސްޕޯޓް މަނާ ކުރުމުގެ މަސައްކަތް މަޖިލީހުގެ މިފެށޭ ދައުރުގައި ކުރިއަށްދާނެކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.

ހީނާ މިހެން ވިދާޅުވީ ރައީސް އޮފީހުގައި ކުރިއަށްދިޔަ ބައްދަލުވުމެއްގައި ވާހަކަ ދައްކަވަމުންނެވެ. ހީނާ ވިދާޅުވީ ރާއްޖެއިން ފަލަސްތީނުގެ ރައްުޔިތުންގެ ހައްގުތަކަށް އަހައްމިއްޔަތުކަމަށް ބަދަލެއް ނާންނަކަމަށާއި ރާއްޖެއިން އަބަދުވެސް ފަލަސްތީނުގެ ހައްގުގައި އަޑު އުފުލާނެކަމަށެވެ. މި ސަރުކާރުން އަބަދުވެސް ފަލަސްތީނުގެ ހައްގުގައި ވަކާލާތުކުރާނެ ކަމަށް ވިދާޅުވެ ހީނާ ވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެސް ފަލަސްތީނުގެ ރައްޔިތުންގެ ހައްގުގައި ކުރައްވާ މަސައްކަތްތައް ފާހަގަކުރައްވާފައެވެ. އެގޮތުން ހީނާ ވިދާޅުވީ ރައީސް މުއިއްޒު ފަލަސްތީނުގެ ރައްޔިތުންގެ ޙައްގުގައި އެކި ޕްލެޓްފޯމްތަކުގައި އެމަނިކުފާނުގެ ޚިޔާލު ފާޅުކުރައްވަމުން ގެންދަވާކަމަށެވެ،

ފަލަސްތީނަކީ އަޅުގަނޑުމެންގެ އަޚުންނާއި އުޚުތުން ދިރިއުޅެމުން އަންނަ ޤައުމެއް. އެހެންކަމުން ފަލަސްތީނާ ދޭތެރޭގައި އަޅުގަނޑުމެންގެ އޮތް ސްޓޭންޑެއް ބަދަލެއް ނުވޭ. މިހާރު "ރައްޔިތުންގެ މަޖިލިސް މިއޮތީ ޗުއްޓީގައި. އިރާދަކުރެއްވިއްޔާ ޗުއްޓީއަށްފަހު މަޖިލިސް ފެށިގެންދާއިރު މި މަސައްކަތްތައް ވަރަށް ބާރަށް ކުރިއަށްދާނެ" ރައީސް އޮފީހުގެ ތަރުޖަމާނު: ހީނާ ވަލީދު

ސަރުކާރުން މަޖިލީހަށް ހުށައައެޅި މިބިލު މިހާރު ވަނީ ސަލާމަތީ ޚިދުމަތްތަކާބެހޭ ކޮމިޓީގެ ދިރާސާ މަރުހަލާގައި ކަމަށް ހީނާ ވަނީ ވިދާޅުވެފައެވެ. މީގެ އިތުރަށް ހީނާ ވިދާޅުވީ ރާއްޖެއިން 7800 މަސްދަޅު ކޭސް ފޮނުވަން ހަމަޖެހިފައިވާ ކަމަށާއި ފަލަސްތީނުގެ ރައްޔިތުންނާ އެތަކެތި ހަވާލުކުރެވޭނެކަމަށް ބެލެވެނީ 40 ދުވަހުގެ ފަހުންކަމަށެވެ.އިޖިޕްޝަން ރެޑްކްރެސެންޓު މެދުވެރިކޮށް ފަލަސްތީނުގެ ރެޑްކްރެސެންޓް ސޮސައިޓީއާ ކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ވިދާޅުވިއެވެ.