އިސްރާއީލުގެ ސިފައިން ޣައްޒާގައި ދެމުންގެންދާ އަނިޔާވެރި ހަމަލާތަކުގައި އިތުރު 24 ފަލަސްތީނުން ޝަހީދުވެއްޖެއެވެ.

ހައްދުފަހަނާއަޅާފައިވާ އިސްރާއީލުން މިދިޔަ އަހަރުގެ އޮކްޓޯބަރު 7 އިން ފެށިގެން ޣައްޒާއަށް ދެމުންދާ ލާއިންސާނީ ހަމަލަތަކުގައި މިހާތަނަށް ޝަހީދުވި މީހުންގެ އަދަދު 41،206 އަށް އަރާފައިވާކަމަށް ޣައްޒާގެ ސިއްޙީ ވުޒާރާއިން ވަނީ ބުނެފައެވެ.ޣައްޒާގެ ސިއްޙީ ވުޒާރާއިން ނެރުނު ބަޔާނެއްގައި ބުނެފައިވާ ގޮތުގައި، މިހާތަނަށް 95،337 މީހުން ޒަޚަމްވެފައިވެއެވެ. އަދި ވޭތުވެދިޔަ 24 ގަޑިއިރުގެ ތެރޭގައި އާއިލާތަކަށް އަމާޒުކޮށް ހިންގި ތިން "ގަތުލުއާންމު" ގައި 24 މީހުން މަރުވެ، 57 މީހުން ޒަޚަމްވެފައިވާކަމަށް އެ ވުޒާރާއިން ހާމަކޮށްފައިވެއެވެ.އޮކްޓޯބަރު 7 ގައި ހަމާސްއިން ދިން ހަމަލާއަކަށްފަހު، އިސްރާއީލުން ވަނީ ޣައްޒާއަށް އަނިޔާވެރި ހަމަލާތަކެއް ދޭން ފަށާފައެވެ. އެކި ފަރާތްތަކުން، ޚާއްޞަކޮށް އދ. ގެ ސަލާމަތީ މަޖިލީހުން ވަގުތުން ހަނގުރާމަ ހުއްޓާލުމަށް ގޮވާލާފައިވީ ނަމަވެސް، އިސްރާއީލުން ވަނީ މި ހަމަލާތައް ހުއްޓުމެއްނެތި ކުރިއަށް ގެންގޮސްފައެވެ.