ލޭޑިސްފިންގާ ގެ ނަމުން މަޝްހޫރުވެފައި ވާ މި ތަރުކާރީއަކީ އެކި ކެއުންތަކުގައި އާންމުކޮށް ބޭނުންކުރާ ނިއުޓްރިޝަންސް އެކުލެވޭ ތަރުކާރީއެކެވެ.

މިއީ ހަޖަމުކުރުމަށް އެހީތެރިވެދޭ އަދި ފައިބަރު ގިނަ އަދަދަކަށް އެކުލެވިގެންވާ ސިއްހަތަށް ފައިދާހުރި ތަރުކާރީއެކެވެ. ލޭޑިސްފިންގާ ގަވާއިދުން ކެއުމުން ބަނޑުގެ ހަރަކާތްތައް ރެގިއުލޭޓްކޮށް، ބަނޑުހައިހޫނުކަމުން ދުރުކޮށްދީ، މުޅި ހަޖަމުކުރުމުގެ ނިޒާމަށް ގިނަ އެހީތަކެއް ފޯރުކޮށްދެއެވެ. އިންސާނާގެ ހަށިގަނޑުގެ ދިފާއީ ނިޒާމު ވަރުގަދަކޮށް ބަދަހިކޮށް ހީވާގިކޮށްދޭ އެއް މާއްދާ އަކީ ވިޓަމިން ސީ އެވެ. ވިޓަމިން ސީ އަކީ ލޭޑިސްފިންގާގައި ގިނަ އަދަދަކަށް އެކުލެވޭ މާއްދާއެކެވެ.

އަދި ލޭޑިސްފިންގާ އަކީ މެގްނީޒިއަމް އަދި ޕޮޓޭސިއަމް ފަދަ ވިޓަމިންސް އާއި މިނަރަލްސް އެކުލެވިގެންވާ ތަރުކާރީއެކެވެ. ޕޮޓޭސިއަމް އަކީ ލޭގެ ޕްރެޝަރު ރެގިއުލޭޓް ކުރުމަށް އެހީތެރިވެދޭ އަދި މެގްނީޒިއަމް އަކީ މަސްތަކާއި ނާރުތަކުގެ މަސައްކަތްތަކަށް އެހީތެރިވެދޭ އެއްޗެކެވެ.

ލޭޑިސް ފިންގާ ގައި އިންސާނުންނަށް ފައިދާކުރުވަނި އެހެން މާއްދާތައްވެސް ހުންނާނެއެވެ. މި ބަލާލެވުނީ އާއްމުކޮށް، ގިނައިން އެކުލެވިގެންވާ މާއްދާތަކަށެވެ. ކެއުމުގައި އާންމުކޮށް ލޭޑީސްފންގާ ބޭނުން ނުކުރި ނަމަވެސް މިއީވެސް ކެއުމުގައި ބޭނުންކުރުން މުހިއްމު ތަރުކާރީއެކެވެ.