ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްސަލައިގައި އައު ހެކިތައް ބަލައިގަތުމާއި ގުޅޭބައި ސުޕްރީމް ކޯޓުގައި މާދަމާ ފަށަން ތައްޔާރުވެއްޖެއެވެ.

ސުޕްރީމް ކޯޓުގައި މި މައްސަލަ ތާވަލްކޮށްފައި ވަނީ މާދާމާގެ ހެނދުނުގެ 09:00 އަށެވެ.

ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗައް އިއްވާފައިވާ 11 އަހަރުގެ ޖަލު ހުކުމް ބާތިލްކޮށް، އަލުން އެމައްސަލަ ބަލާއިރު ދައުލަތުން ހުށަހަޅާފައިވާ އައު ހެކިތަަކަށް ބުރަދަން ނުދޭން ހައިކޯޓުން ހުކުމް ކުރުމުން ދައުލަތުން މައްސަލަ ވަނީ އިސްތިއުނާފުކޮށްފައެވެ.

އެ ހެކިތައް ދަށު ކޯޓަށް ބަލައިގަތުމުގެ އިޖުރާއަތް ރަނގަޅުނޫންކަމަށް ބުނެ ހެކިތައް އެއް ފަރާތްކުރުމަށް ހައިކޯޓުން އެންގުމުން މައްސަލައިގައި އަލުން ގޮތެއް ކަނޑައެޅުމުގައި، ހެކިތަކާ ގުޅިގެން، ދިފާޢުން ހުށަހެޅުމެއް އޮތްނަމަ ހުށަހެޅުމުގެ ފުރުޞަތުދީ، އެ ހެކިތައް ބަލައިގަތުމާމެދު އަލުން ގޮތެއް ކަނޑައެޅުމަށް ދަށު ކޯޓަށް އަންގައިދިނުމަށް ޕީޖީއިން ސުޕްރީމު ކޯޓުގައި އެދިފައިވެއެވެ.

ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިންގެ އަމަލުތައް ހިންގެވިކަމުހެ ކުށް ރައީސް ޔާމީންގެ މައްޗަށް ސާބިތުވާކަމަށް ކަނޑައަޅައި 11 އަހަރަށް ޖަލަށް ލުމާއި 5 މިލިއަން ޑޮލަރުން ޖޫރިމަނާކުރުމަށް ނިންމެވީ 2021 ވަނަ އަހަރުގެ ޑިސެމްބަރު މަހުއެވެ.

މި މައްސަލަ ބައްލަވަނީ ފަނޑިޔާރު އާއިޝާ ޝުޖޫން މުހައްމަދާއި ފަނޑިޔާރު ޑރ. އަޒްމިރާލްދާ ޒާހިރު ގެ އިތުރުން ފަނޑިޔާރު ޑރ. މުހައްމަދު އިބްރާހީމްއެވެ.