ކުރީގެ ރައީސް ޔާމީން އަބުދުލްޤައްޔޫމަކީ ދިވެހިރައްޔިތުންގެ ޑިމޮރެޓިކް ޕާޓީ (އެމްޑީޕީ)އަށް ވަރަށް ބޮޑަށް ފާޑުވިދާޅުވާ ބޭފުޅެކެވެ. އެ ޕާޓީ އަކީ ހަމަ އެއްވެސް ގޮތަކުން ކަމުދާ ވިސްނުމެއް، ސިޔާސަތެއް ގެންގުޅޭ ބަޔެއް ނޫންކަމަށް ތަކުރާރުކޮށް ވިދާޅުވެއެވެ. އެހެންނަމަވެސް މިއަދު މި ފެންނަނީ އެއްކަލަ ކަމުނުދާ ޕާޓީ ކަމުގޮސް ޔާމީން އެމީހުންގެ ކިބައިން މަދަދަށްއެދި، ދެބައި އެކުވެ މަގުމަތި ހަލަބޮލި ކުރެވޭތޯ އުޅޭ މަންޒަރެވެ.

އައު ޕާޓީއާއެކު ކުރިއެރުން ނުހޯދި ފަހަތު ފަޔަށް ބުރަވެފައި

Ad by Hajj Corporation

ޔާމީން މަދު މީސްކޮޅަކާއެކު ސިޓިންގ ރޫމުގައި އެތައް ދުވަހެއް ހޭދަކުރައްވާ، އައު ޕާޓީއާ އެކު މިހާތަނަށް އެއްވެސް ކުރިއެރުމެއް ނުހޯދެއެވެ. ޕާޓީ ރަޖިސްޓަރީ ކުރާނީ ވެސް ދިހަ ހާސް މެމްބަރުންނާއެކު ކަމަށް އަޑުއެރުވި ޕާޓީގެ ދަފުތަރުގައި 21 އޯގަސްޓް 2025 ގެ ނިޔަލަށް ތިބީ 3046 މެމްބަރުންނެެވެ. 5 އަހަރުގެ ދައުރެއް ވެރިކަން ކުރެއްވި ވެރިޔަކަށް ދުވަހަކު ވެރިކަމަށް ނާދެވޭ ޕާޓީތަކަށް ވީ ވަރުވެސް ނުވެއެވެ. އެހާ ތާއީދު އޮތްނަމަ މިހެން މިކަން ނުވީސްތާއެވެ.

ސިޔާސީ މޮބޮޑު ތާއީދެއް ނެތުމުން ވެރިކަމުގައި ލާޖައްސައި، މާލޭގެ ޕްރޭމް ލޮކޭޝަނުން ނެންގެވި ގެކޮޅުގެ ސިޓިން ރޫމުގައި މޫނިފޫހި ފިލުވުމުގެ ވަގުތުތައް ގުނުއްވުމަށްފަހު އެ ގެއިން ބޭރުގައި ޔާމީން އިވެންޓެއް ބާއްވަން ނިންމެވިކަމަށް އަޑުއެރިއިރު، ޔާމީނާއި އެމަނިކުފާނުގެ މަދަދުގާރުންނަށްވުރެ އެއްކަލަ ކަމުނުދާ އެމްޑީޕީއިން މި އިވެންޓް ޕްރޮމޯޓްކުރާލެއް ބޮޑެވެ. މިއީ ބޮޑު ސުވާލެއްތާއެވެ؟

ތާއީދު ނެތުމުން ބޯ ގިނަ ކުރުމުގެ އުކުޅެއް

ފަސް އަހަރުގެ ދައުރެއް ނިންމަވާލެއްވި އިރު ބިނާކުރެއްވި 18 ބުރީގެ ގެކޮޅުގެ ސިޓިން ރޫމް ދޫކުރަށްވައި ޔާމީން ބޭރުގައި އިވެންޓެއް ބޭއްވުމަށް ދިގު މަޝްވަރާތަކެއް ހިނގިކަމަށް މައުލުމާތު ލިބެއެވެ. މި މަޝްވަރާތައް ކުރީ އެމްޑީޕީ އާއި އެކުއެވެ. ޔާމީންގެ ގާތް ބޭފުޅެއްގެ ބަހުންނަމަ ''ރަނގަޅު ނަންބަރެއް ދެއްކޭތޯ ބެލޭނެ ފޯމިއުލާ'' އަކީ ހަމައެކަނި އެއީއެވެ. ޕީއެންއެފަކީ މާ ބުރަދަނެއް ހުރި ބަޔަކަށް ނުވުމުން، ކުރީ ސަފުގައި ތިއްބަވާ ދެބައިން ވެސް ސިޔާސީ ހިޖުރަކުރުންތަކާހުރެ ރައްޔިތުންގެ މެދުގައި އޮފް ކެނޑިފައި ތިބުމުން ޕީއެންއެފަށް އޮތް މަގަކީ އެމްޑީޕީ ފައިބުޑަށް ގޮސް އާދޭސްކުރުމެވެ.

މައުލޫމާތު އެނގޭ ޕީއެންއެފްގެ އިސް އެކްޓިވިސްޓަކު ކިޔައިދިން ގޮތުގައި އެމްޑީޕީން ޔާމީނަށް އެއްބާރުލުންދީ ބޯ ގިނަކޮށްދެވޭތޯ ބަލަން ވަނީ އެއްބަސްވެފައެވެ. އެމްޑީޕީގެ އާންމު މޫނުތައް އެ އިވެންޓުން ފެންނާކަށް ޔާމީން ބޭނުންފުޅު ނުވާކަމަށްވެއެވެ. އެއީ ރައްޔިތުންނަށް އޮޅުވާލުމުގެ ބޭނުމުގައެވެ. ޔާމީންގެ މި ޝަރުތާއެކު ވެސް 400 މީހުން ނެރެދޭން އެމްޑީޕީން އެއްބަސްވީ، މަގުމަތި ހަލަބޮލި ކުރުމުން އެ ޕާޓީއަށް ވެސް ސިޔާސީ މޮޅެއް ވެދާނެކަމަށް ހިތާކަމަށްވެއެވެ. ޔާމީން އިވެންޓް ބާއްވަން އެއްބަސްވީ އެމްޑީޕީން 400 މީހުން ނެރެދޭނެކަމަށް ޔަގީން ވުމުންކަމަށް ވެއެވެ.

އެމްޑީޕީން ޔާމީން ޕްރޮމޯޓް ކޮށްދެނީ ، ތެދެއްތަ؟

ޔާމީން ބާއްވަން އުޅޭ އިވެންޓް ޕްރޮމޯޓް ކުރުމުގައި އިސް ސަފުގައި ތިބީ އެމްޑީޕީކަން ސޯޝަލް މީޑިއާ ހާވާލުމުން ފެެނެއެވެ. އެމްޑީޕީގެ އެކްޓިވިސްޓުންނާއި، ކުރީގެ މަޖިލިސް މެންބަރުންނާއި، އެ ޕާޓީގެ އިސްވެރިން ރައީސް ޔާމީން ބާއްވަން އުޅުއްވާ އިވެންޓްތައް ޕްރޮމޯޓް ކުރަމުންދާތަން އެބަ ފެނެއެވެ. އެހެންވީމަ ޔާމީން ޕްރޮމޯޓް ކުރުމުގައި އެމްޑީޕީން ބައިވެރިވެއްޖެކަމަށް އެއީ ފެންނަން އޮތް ތެދެކެވެ.

މިއީ ވަރަށް ތަފާތު މަންޒަރެކެވެ. އެހެނީ ރައީސް ޔާމީނަކީ، އެމްޑީޕީއަކީ ޤައުމަށް ގައްދާރުންކަމަށް އެތައް ފަހަރެއްގެ މަތިން ވިދާޅުވެ، އެ ޕާޓީއަށް ވަރަށް ބޮޑަށް ފާޑުކިޔާފައިވާ ބޭފުޅެކެވެ. އަދި އެމްޑީޕީ ސަރުކާރުތައް ބަދުނާމުކޮށް، އެ ޕާޓީގެ ސިޔާސަތުތަކަށް ވަރުގަދަޔަށް ފާޑުވިދާޅުވަމުން ގެންދެވި ބޭފުޅެކެވެ. ނަމަވެސް މިހާރު މިފެންނަނީ މުޅިން ތަފާތު މަންޒަރެކެވެ. ސިޔާސީ ބަލިކަށިކަމުގައި ކަމުނުދިޔަ ޕާޓީގެ އަތުގައި ވެސް ހިފީއެވެ.

ފަހަތުގައި ހަލަބޮލި ކުރުމުގެ ރޭވުން

އެމްޑީޕީ އާއި ރައީސް ޔާމީންގެ ވެސް ބޭނުމެއްކަމުގައި މިކަމުގައި ފެންނަން އޮތީ މަގުތައް ހަލަބޮލިކޮށް ރާއްޖޭގައި އޮތް ސިޔާސީ ހަމަޖެހުން ގަޑުބަޑުކުރުމެވެ. އަމިއްލަ އެދުމާއެކު ރާއްޖޭގެ އިގްތިސާދު ހުއްޓުވައި، ވެރިކަން ހިންގުމަށް ދަތި ކުރެވޭތޯ ބެލުމެވެ.

މިއެއްވުމުގައި ބައިވެރިވުމަކީ ގައުމު ހަލަބޮލި ކުރުމުގައި ބައިވެރިވުމެވެ. އެމްޑީޕީން އިނދަޖައްސާލި އިގްތިސާދު ކޮޅަށް ޖެހުމަށް މި ސަރުކާރުން ހޯދަމުން އަންނަ ކާމިޔާބީތަކަށް ދަތިކުރުމުގައި ބައިވެރިވުމެވެ. ޤަބޫލުކުރަންޖެހޭ ހަގީގަތަކީ ގައުމު ހަލަބޮލިކުރުމުން ފޯރާ ނޭދެވޭ އަސަރު ހަމަ ތިމާއަށް ވެސް ކުރާނެކަމެވެ.

ކީހާޅެން ފަރިއްސަށްވުން

ޔާމީން އެމްޑީޕީއަށް ފާޑުވިދާޅުވެ، އެމްޑީޕީ ކަމުގޮސް ބައިވެރިވުން ހޯދުމަކީ ޔާމީން ދެއްކެވިހާ ވާހަކަތައް އެކޮޅުކޮޅުން ޖެހުމެވެ. އެމްޑީޕީން ޔާމީނަށް ހެޔޮ ނޭދޭނެކަމާއި، އެމްޑީޕީން ވެސް ބޭނުންވާނީ ހާލަތުގެ ނާޖާއިޒު ފައިދާ ނަގަންކަން ޚުދު ޔާމީނަށް ވިސްނިވަޑައި ނުގަންނަވަނީ ކުރިމަތިވެފައިވާ ސިޔާސީ ލަދުން އަރައިގަނެވޭތޯ އެދުންވެރިކަން ހުރި މިންވަރުންކަމަށް ވެދާނެއެވެ.

ކޮންމެއަކަސް ބަލަންތިބަ ކަތުންނަށް މަންޒަރު ސާފެވެ. އެމްޑީޕީން އުޅެނީ ޔާމީން ވާވައްދާށެވެ. އެވަލަށް ޔާމީން ވަންނަވައި، ރައްޔިތުން ވެސް ވާވައްދަވަން އުޅުއްވަނީއެވެ. އަމިއްލަފުޅަށް ދެއްކެވި ވާހަކަތައް ބޮލާލާޖަހައި، ދެއްކެވިހާ ވާހަކަފުޅުތައް ތާކުންތާކު ނުޖެހިދިޔައީ ހަމަ އެދުމާ ހެދިކަމަށް ބުނެވިދާނެ ފުރުސަތު އެބައޮތެވެ. މިކަންކަމާ ރައްޔިތުން ވިސްނާނެއެވެ.