އަންނަ އަހަރު ނިމުމުގެ ކުރިން ސްޓެލްކޯގެ ހުރިހާ ކަސްޓަމަރުންނަށް ސްމާރޓް މީޓަރގެ ޚިދުމަތް ފޯރުކޮށްދޭނެކަމަށާއި ގޭބީސީތަކުގައި ސްމާރޓް މީޓަރ ހަރުކުރުމުގެ މަސައްކަތްވެސް އެ ކުންފުނިން ވަރަށް ޚާއްސަ އިސްކަމެއްދީގެން ކުރަމުން އަންނަ ކަމެއް ކަމަށް އެ ކުންފުނީގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވެއްޖެއެވެ.

ސަރުކާރަށް 52 ހަފްތާ ވުމާއި ގުޅިގެން ދަޢުލަތުގެ މީޑިޔާއަށް ދެއްވި ޚާއްސަ އިންޓަވިއުއެއްގައި ހުސައިން ފަހުމީ ވިދާޅުވީ، ޚަރަދު ކުޑަކުރުމަށް އެ ކުންފުނިން ގިނަ މަސައްކަތްތަކެއް ކުރަމުންދާކަމަށެވެ.

ހަމައެހެންމެ މިއަހަރު ނިމުމުގެ ކުރިން ހުޅުމާލޭ 2 ވަނަ ފިޔަވަހީގައި ސްމާރޓް މީޓަރ ހަރުކުރުމުގެ މަސައްކަތް ފަށާނެކަމަށާއި ސްމާރޓް މީޓަރ ޕްރޮޖެކްޓާއެކު ކަރަންޓް ބިލް ބޮޑުވެގެން ކަސްޓަމަރުންގެ ފަރާތުން އަންނަ ކަންބޮޑުވުންތަކަށް ހައްލު ލިބިގެންދާނެކަމަށްވެސް ފަޙުމީ ވަނީ ވިދާޅުވެފައެވެ.

ސްޓެލްކޯއަށް މާލޭގެ މަގުތަކުގައި ހަރުކޮށްފައިވާ ލައިޓްތައް ދިއްލާ ނިއްވޭގޮތް ހެދުމުގެ މަސައްކަތް ކުރަމުންދާކަމަށްވެސް އެ ކުންފުނިން ދާދި ފަހުން ވަނީ ހާމަކޮށްފައެވެ.

އެގޮތުން މަގުމަތީގައި ހުރި ލައިޓްތައް މިހާރު އޮޓޯމެޓިކްކޮށް ނިވި ދިއްލޭތީ ގާތްގަނޑަކަށް 40 އަކަށް މިނެޓް ކޮންމެ ދުވަހަކުވެސް ބޭކާރުވާކަމަށާއި މިއީ ވަރަށް ބޮޑު ޚަރަދެއްކަން އެ ކުންފުނިން ވަނީ ފާހަގަކޮށްފައެވެ.