ފާނަބަސަންދަކީ ވައިރަހަކުން ޖެހެ ބައްޔެކެވެ. މި ބައްޔަކީ އާންމުކޮށް ކުޑަކުދިންނަށް ޖެހޭ ބައްޔެކެވެ. ނަމަވެސް ބޮޑެތި މީހުންނަށްވެސް މި ބަލި ޖެހެއެވެ.

މި ބަލީގެ އަލާމާތްތަކުގެ ތެރޭގައި ހުން އައުން، ވަރުދެރަވުން، ނޭފަތުން ފެން އައުން، އަދި ހަމުގައި ބިހިތައް ނެގުން ހިމެނެއެވެ. މި ބިހިތައް ފެންފޮޅުތަކަށް ބަދަލުވެއެވެ. (މި ބިހި ތަކަކީ ވަރަށް ހިރުވާ އަދި ފަސޭހައިން ފަޅައިގެންދާ ބިހި ތަކެކެވެ. އަދި ދެތިން ދުވަސްތެރޭގައި ހަށިގަނޑުގެ އެކި ތަންތާ ފެންބިހި ނަގައެވެ.

މި ބަލި ފެތުރެން ދިމާވާ ސަބަބުތަކުގެ ތެރޭގައި ބަލި ޖެހިފައި ހުރި މީހަކު ކެއްސާ ކިނބިހި އަޅާ ހަދާއިރު، ނޭވާލާ ނިޒާމުގެ ޒަރިއްޔާއިން މި ބަލި ފެތުރެއެވެ. މީގެ އިތުރުން، ބިހި ނަގާފައި ހުރި މީހެއްގެ ގަިގައި ބީހުމުން ނުވަތަ އޭނާ ބޭނުންކޮށްފައިވާ ތުވާލި، އަންނައުނު ފަދަ ތަކެތި ބޭނުންކުރުމުންވެސް މި ބަލި ޖެހެއެވެ. ހަމަ މިއާއެކު ގައިގައިހުރި ބިހިތައް އެއްކޮށް ކުރަމަގާލިލަންދެން މި ބަލި އެކަކު ގައުން އަނެކަކު ގަޔަށް ފެތުރުމުގެ ފުރުސަތު އޮންނާނެ އެވެ.

ކުރިން ފާނަބަސަންދު ނުޖެހޭ ކޮންމެ މީހަކީ މި ބަލި ޖެހިދާނެ މީހެކެވެ. މި ބަލި ޖެހިއްޖެނަމަ ދެވަނަ ފަހަރަށް މި ބަލި ޖެހުމުގެ ފުރުސަތު ވަރަށް ކުޑައެވެ.

މި ބަލި ޖެހުމުން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމަކީ ވަރަށް މުހިންމު ކަމެކެވެ. ބަލިޖެހިފައިވާ މީހުން ގާތަސް ޒިޔާރަތް ނުކުރުމާއި މި ބަލި ޖެހިފައިވާ މީހާ އޭނާގެ ގައިގައި ނަގާފައިވާ ބިހިތައް އެއްކޮށް ކުރަމަގާލި ލަންދެން ބޭރު ތެރެއަށް ނުނިކުތުމަކީ މުހިންމުކަމެކެވެ. އަދި ފާނަ ބަސަންދު ޖެހިއްޖެނަމަ ގޭގައި އުޅެ އެހެން މީހުންނާއި އެކަހެރި ވާން ވާނެއެވެ. ބަލި ރަނގަޅުވަންދެން ހިފާ ގެންގުޅޭ ތަކެތި ވަކި ކުރުން މުހިންމެވެ.