ޕީއެންސީއަށް މެމްބަރުން އިތުރުކުރީ ފައިސާ ދީގެން ނުފޫޒު ފޯރުވައިގެން ނޫން ކަމަށާ ޕާޓީ އާއި މެމްބަރުން ގުޅެނީ ރައީސް ޑރ މުއިއްޒުގެ ސިޔާސަތު ކަމުދާތީ ކަމަށް ޕީއެންސީގެ ޗެއާޕާސަން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ޕީއެންސީ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އަބްދުއްރަހީމް ވިދާޅުވީ ރައީސް ޑރ.މުހައްމަދު މުއިއްޒުގެ ވެރިކަމަށް 1 އަހަރު ފުރޭއިރު ޕާޓީގައި 75000 މެމްބަރުން ތިބުމަކީ ރައީސް އުންމީދު ކުރެއްވި ގޮތް ކަމަށެވެ.

ޕާޓީއަށް މެމްބަރުން އިތުރު ކުރުމުގެ މަސައްކަތް މާލެއާއި އަތޮޅު ތެރޭގައި ވަރަށް ފޯރިޔާ އެކު ކުރިއަށް ގެންދިޔަ ކަމަށް އަބްދުއްރަހީމް ވިދާޅުވި އެވެ. އަބްދުއްރަހީމް ވިދާޅުވީ ޕާޓީ އަށް މެމްބަރުން އިތުރުކުރީ އެއްވެސް ވަރަކަށް ފައިސާ ދީގެން ނުފޫޒު ފޯރުވައިގެން ނޫން ކަމަށާ ރައްޔިތުން ހިތުން ރުހުމުން ކަމަށެވެ. ޕާޓީ އަށް މެމްބަރުން އިތުރު ކުރުމަށް މާލެއާއި އަތޮޅު ތެރޭގައި ހިންގި ހަރަކާތުގައި ގޭގެއަށް ޒިޔާރަތްކޮށް ޕާޓީގެ ވިސްނުމާ ސިޔާސަތުތައް ރައްޔިތުންނަށް ސާފުކޮށްދިނުމުން އެރައްޔިތުން ޕާޓީއާއި ގުޅުނީ ޕާޓީގެ ސިޔާސަތުތައް ރައްޔިތުން ބަލައިގަންނާތީ ހިތުން ރުހުމުން ކަމަށް އަބްދުއްރަހީމް ވިދާޅުވި އެވެ.

"އެކަން ކުރީ ނުފޫޒު ފޯރުވައިގެނެއްވެސް ނޫން އަޅުގަނޑުމެން ރަށްރަށަށް ވެސް ދަތުރު ކުރީމު ގޭގެއަށްވެސް ޒިޔާރަތް ކުރީމު ގޭގެއަށްގޮސް ގޭގޭގައި ތިއްބަވާ މީހުންނަށް އަޅުގަނޑުމެންގެ ވިސްނުމާ އަޅުގަނޑުމެންގެ ފިކުރާ ރައީސްގެ ސިޔާސަތުތައް ހުށަހެޅީމު ހުށަހަޅައިގެން ރައްޔތުން ހިތުން ރުހުމުން އުފަލުން އަޅުގަނޑުމެންގެ ޕާޓީއަށް ވަތް މީހުން މިހާރު ޕާޓީގަ އެތިބީ"

އަބްދުއްރަހީމް ވިދާޅުވީ ވާދަވެރިންގެ ހިތުގައި އަބަދުވެސް ޝައްކު އޮންނާނެ ކަމަށާ ފާޑުވެސް ކިޔާނެ ކަމަށެވެ. ސިޔާސީ ކަންކަމުގައި އުޅެނީ ވާދަވެރިން މޭކަރާނެކަން އިނގި ވާދަވެރިން ފާދުކިޔާނެކަންވެސް އިނގޭތީ ކަމަށެވެ.

އަބްދުއްރަހީމް ވިދާޅުވީ ހަގީގަތުގައިވެސް މިއަދު ރައްޔިތުން ރައީސް މުއިއްޒުގެ ސިޔާސަތުތައް ބަލައިގެންފައިވާ ކަމަށެވެ. އިދިކޮޅު ފަރާތްތަކަށް ހަޖަމްނުވަނީ އެކަންކަމަށް އަބްދުއްރަހީމް ވިދާޅުވި އެވެ. ޕާޓީއާއި ރައްޔިތުން ގުޅެނީ ރައީސް ޑރ. މުއިއްޒުގެ ސިޔާސަތުތައް ހަރުދަނާކަމުން ކަމަށްވެސް އަބްދުއްރަހީމް ވިދާޅުވި އެވެ.