މިއަހަރަކީ ރާއްޖޭގެ ތާރީޚުގައިވެސް އެންމެ ގިނައިން ވާރޭ ވެހުނު އަހަރު ކަމަށާއި ރާއްޖޭގެ ރަށްރަށް ގިރުމާއި ފެން ލޮނުވުމުގެ މައްސަލަތައް ކުރިމަތިވަމުންދާއިރު މިކަކަންމަށް ބޭރުގެ މާލީ އެހީތެރިކަން ބޭނުންވާކަމަށް އެންވަޔަރމަންޓް މިނިސްޓަރ ޠާރިޤް އިބްރާހީމް ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، ބީބީސީއަށް ދެއްވި ބަސްތީގަތުމެއްގައެވެ.

ކޮޕް-29 ސަމިޓުގައި މޫސުމަށް އަންނަ ބަދަލުތަކަށް ހޭދަ ކުރުމަށް ކަނޑައެޅި 300 ބިލިޔަން ޑޮލަރަކީ އެކަށީގެންވާ އަދަދެއްކަމަށް ރާއްޖެއިން ޤަބޫލުނުކުރާކަމަށް މިނިސްޓަރ ވަނީ ފާހަގަ ކުރައްވާފައެވެ.

ތިމާވެށްޓާއި ބެހޭ ވަޒީރު ވިދާޅުވީ، ރާއްޖެއިން މި ދާއިރާގައި މިހާރުވެސް ގިނަ މަސައްކަތްތަކެއް ކުރަން ގަސްތުކޮށްފައިވާ ކަމަށެވެ.

އެގޮތުން ރާއްޖޭގައި ބޭނުން ކުރާ ހަކަތައިގެ 33 އިންސައްތަ އިޔާދަކުރަނިވި ހަކަތައަށް ބަދަލުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސިޔާސަތެއްކަން ފާހަގަކުރައްވާ ވަޒީރު ވަނީ މިދާއިރާއިން ކުރެވޭ މަސައްކަތްތައް ތަފްސީލްކޮށްދެއްވާފައެވެ.ބީބީސީއަށް ދެއްވި ބަސްތީގަތުމުގައި ވަޒީރު ވަނީ މިފަދަ އެހީތައް ރާއްޖެއަށް މުހިންމުވާ ސަބަބުތައްވެސް ތަފްސީލުކުރައްވާފައެވެ. އެގޮތުން މިވަގުތު ދިމާވާ އެންމެ ބޮޑު ގޮންޖެހުންތަކުގެ ތެރޭގައި މޫސުން ލަފާ ކުރަން ދަތިވާވަރަށް މޫސުމަށް ބަދަލުތައް އައުން ހިމެނޭކަމަށް ވަޒީރު ވިދާޅުވިއެވެ.

އަދި މިއަހަރަކީ ރާއްޖޭގެ ތާރީޚުގައިވެސް އެންމެ ބޮޑަށް ވާރޭވެހުނު އަހަރުކަން ފާހަގަކުރައްވަމުން، ރާއްޖޭގެ ރަށްރަށް ގިރުމާއި ފެން ލޮނުވުމުގެ މައްސަލަތައް ކުރިމަތިވަމުންދާއިރު މިކަކަންމަށް ބޭރުގެ މާލީ އެހީތެރިކަން ބޭނުންވާކަމަށް ވަޒީރު ވިދާޅުވިއެވެ.