ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ސަބްސިޑަރީ ކުންފުންޏަކަށް ފެނަކަ ކޯޕަރޭޝަން ލިމިޓެޑު ހެދުމަށް ސަރުކާރުން ކުރަމުން އައި މަސައްކަތް ހުއްޓާލައިފި އެވެ.

މި އަހަރު ނިމުމުގެ ކުރިން އެސްޓިއޯގެ ދަށަށް ފެނަކަ ބަދަލު ކުރަން ރައީސް ޑރ. މުހައްމަދު މުއިއްޒު ނިންމަވާފައިވަނީ އޮގަސްތު މަހުގެ 26 ވަނަ ދުވަހު އެވެ.

އެސްޓީއޯ އިން މިއަދު ނެރުނު ބަޔާނެއްގައި ބުނީ، ފެނަކަ އެސްޓިއޯގެ ދަށަށް ބަދަލުކުރުމުގެ މަސައްކަތް މިހާރު ހުއްޓަލާފައިވާ ކަމަށެވެ. މި މަސައްކަތް ހުއްޓާލީ ފިނޭންސް މިނިސްޓްރީން އެންގުމުން ކަމަށެވެ.

އެސްޓިއޯއިން ބުނެފައިވަނީ އެ ކުންފުނިން ސަރުކާރަށް ހުށަހެޅި އެކުއިސިޝަން ޕްރޮޕޯސަލްގައި ހިމެނިފައިވާ ކަންކަން ކުރިއަށްގޮސްފައިވާ މިންވަރަށްބަލާ، އެސްޓީއޯއިން ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް މި ކުންފުނީގެ ޑިރެކްޓަރުންގެ ބޯޑުން ނިންމާފައިވާ ކަމަށެވެ.

އެސްޓިއޯގެ ދަށަށް ފެނަކަ ބަދަލްކުރަން ރައީށް ނިންމަވާފައިވަނީ ވަޒީރުންގެ މަޖިލީހުގެ ލަފާގެ ދަށުންނެވެ. މިކަމަށް ހުށައަޅުއްވާފައިވަނީ ފިނޭންސް މިނިސްޓަރ މުހައްމަދު ޝަފީގުއެވެ.

މިނިންމުމުގެ ބޭނުމަކީ ޔުޓިލިޓީ ސެކްޓަރ ހަރުދަނާކުރުމަށާއި، ރައްޔިތުންނަށް ފޯރުކޮށްދެވޭ ޚިދުމަތް ރަނގަޅު ފެންވަރެއްގައި އެދެވޭ އަވަސް މިނެއްގައި ފޯރުކޮށްދެވިގެންދާނެއެވެ. މިއާއި އެކު ފެނަކަ ހިންގުން ހަރުދަނާވެ މާލީ ގޮތުން ބާރުވެރިވެރިވެގެންދާނެ ކަމަށް ރައީސުލްޖުމްހޫރިއްޔާގެ އޮފީހުން ނެރުނު ބަޔާނުގައިވެއެވެ.

އެގޮތުން މި ނިންމެވި ބަދަލު ގެނައުމަށްޓަކައި، އެސް.ޓީ.އޯ. ގެ އަސާސީ ގަވާއިދަށް ގެންނަންޖެހޭ ބަދަލުތައް ގެނައުމަށާއި، އެސް.ޓީ.އޯ. ގްރޫޕްގައި ޢަމަލުކުރަމުން އަންނަ ގޮތަށް ގަވަރނަންސް ހަރުދަނާކޮށް ބެސްޓް ޕްރެކްޓިސްއާ އެއްގޮތަށް ކުންފުނީގެ ކަންކަން ތަރުތީބުކުރުމުގެ ފުރިހަމަ އިޚްތިޔާރު އެސް.ޓީ.އޯއަށް ދިނުމާއެކު ވިޔަފާރީގެ ހަރަކާތްތައް ސްޓްރީމްލައިންކުރުމާއި، ރަނގަޅު އުސޫލުތައް ތަންފީޒް ކުރުންފަދަ ކަންކަމުގެ އިހްތިޔާރު އެސް.ޓީ.އޯ.އަށް ދިނުމަށް ވަނީ ނިންމަވާފައިކަމަށް މި ބަޔާނާއި ހަވާލާދީ ރައީސް އޮފީހުން ވަނީ ހާމަކޮށްފައެވެ.