ފެނަކަ ކޯޕަރޭޝަންގެ މުވައްޒަފުންނަށް ބޭނުންވާ ތަމްރީނު ޕްރޮގްރާމްތައް ހިންގުމަށާއި އެ ކޯޕަރޭޝަނުން ދެމުންދާ ޚިދުމަތްތަކާ ގުޅޭ ދިރާސާތައް ހެދުމަށް ވިލާ ކޮލެޖާއެކު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ފެނަކަ ކޯޕަރޭޝަންގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ މުޢާޒް މުހައްމަދު ރަޝީދެވެ. އަދި ވިލާ ކޮލެޖްގެ ފަރާތުން ސޮއިކުރެއްވީ ކޮލެޖްގެ ވައިސް ރެކްޓަރ ޑރ. އަލީ ނަޖީބެވެ. އެއްބަސްވުމުގައި ސޮއިކުރުމަށްފަހު، ދެ އިދާރާ ގުޅިގެން ޕްރޮގްރާމްތައް ހިންގާނެ ގޮތާ ގުޅޭގޮތުން މަޝްވަރާކޮށްފައިވެއެވެ.

މި އެއްބަސްވުމުގެ ދަށުން، ގުޅުން ހުރި ދާއިރާތަކުން ކުންފުނީގެ މުވައްޒަފުންނަށް ތަފާތު ތަމްރީނުތައް ހިންގާނެއެވެ. ޚާއްޞަކޮށް ޓެކްނިކަލް މުވައްޒަފުން ޔޫޓިލިޓީ ރެގިއުލޭޓަރީ އޮތޯރިޓީ (ޔޫއާރްއޭ) ގެ މިންގަނޑަށް ތަމްރީނުކޮށް، އެކަމުގެ ސެޓްފިކެޓް ދިނުމަށް ވަނީ ހަމަޖެހިފައެވެ.

ފެނަކައިން މަޢުލޫމާތު ދެއްވާފައިވާ ގޮތުގައި، މިހާރު ފެނަކައިގައި މަސައްކަތްކުރާ ގިނަ މުވައްޒަފުންނަކީ ޓެކްނިކަލް މަސައްކަތްތަކުގެ ހުނަރާއި ޤާބިލުކަން ހުރި މީހުން ނަމަވެސް، ޤައުމީ ފެންވަރުގައި ޤަބޫލުކުރާ ސެޓްފިކެޓެއް ނެތް މުވައްޒަފުންނެވެ. އެހެންކަމުން މި އެއްބަސްވުމުގެ ދަށުން ދާއިރާގައި ބަލައިގަންނަ ޕްރޮފެޝަނަލް މިންގަނޑުތަކަށް މުވައްޒަފުން ތަމްރީނު ކުރެވޭނެއެވެ.

މީގެ އިތުރުން، މި އެއްބަސްވުމުގެ ދަށުން ފެނަކައިގެ ޚިދުމަތްތަކާ ގުޅޭ ދިރާސާތައްވެސް ކުރުމަށް ހަމަޖެހިފައިވެއެވެ. މި ދިރާސާތަކުގެ މަޤްޞަދަކީ މިހާރު ފެނަކައިން ޚިދުމަތްދޭ ގޮތްތަކާއި އެކަންކަމާ މެދު އާންމުންގެ ޚިޔާލު ހޯދުމާއި، ރައްޔިތުން ބޭނުންވާފަދަ ފެންވަރު ރަނގަޅު ޚިދުމަތެއް ދިނުމަށް ބޭނުންވާ މަޢުލޫމާތު އެއްކުރުމެވެ.