ސްމާޓް މީޓަރާއެކު ކަރަންޓް ބިލު ބޮޑުވެގެން އާންމުން ކުރާ ޝަކުވާތަކަށް ހައްލެއް ލިބިގެންދާނެކަމަށް ފެނަކަ ކޯފަރޭޝަންގެ މެނޭޖިންގ ޑިރެކްޓަރ މުއާޒް މުޙައްމަދު ރަޝީދު ވިދާޅުވެއްޖެއެވެ.

ދ. ކުޑަހުވަދޫގެ ހުރިހާ ގޭބީސީއެއްގައި ސްމާޓް މީޓަރު ހަރުކޮށް ނިންމުމުގެ ރަސްމިއްޔާތުގައި ވާހަކަ ދައްކަވަމުން މުއާޒް ވިދާޅުވީ، ކަރަންޓު ބިލު ބޮޑުވާ ޝަކުވާތަކަކީ ރައްޔިތުންގެ ފަރާތުން އަންނަ ވަރަށް ކަންބޮޑުވާ މައްސަލައެއް ކަމަށާއި، ސްމާޓް މީޓަރާއެކު ބިލްތައް ބޮޑުވެގެން އަންނަ ޝަކުވާތަކަށް ހައްލެއް ލިބިގެންދާނެ ކަމަށެވެ.

މުއާޒް ވިދާޅުވީ، ކޮންމެ މަހެއްްވެސް ނިމި ކަރަންޓް ބިލް އައުމުން ރައްޔިތުންގެ ޝަކުވާ ވަރަށް ބޮޑު ކަމަށެވެ.

ކަރަންޓް ބޭނުންކުރެވޭ މިންވަރު މިހާރު މި އެނގެނީ މަސް ނިމި ބިލް އަތައް އައުމުން. ދެން ރައްޔިތުން މި ޝަކުވާ ކުރަނީ ތިމަންނަމެން ބޭނުންކުރި މިންވަރެއް ނޫނޭ މިއީ. ނުވަތަ ތިމަންނަމެން ގޭގައި އިތުރު އެއްވެސް އެއްޗެއް އިތުރެއް ނުކުރަމޭ. އެކަމަކު މިކަން ރައްޔިތުންނަށް މި އެނގެނީ އަނެއްކާވެސް ބިލް އައީމަ. މި ޝަކުވާ ރައްޔިތުން ކުރަން މިފަށަނީ އެހިސާބުން. މުއާޒް ވިދާޅުވިއެވެ.

އެހެން ނަމަވެސް ސްމާޓް މީޓަރުގެ ސަބަބުން ކޮންމެ ދުވަހަކު, އޭގެ ކުރީދުވަހު ބޭނުންކުރެވުނު ކަރަންޓްގެ ތަފްސީލް ކޮންމެ މީހެއްގެ ފޯނުން ބަލާލެވޭނެ ކަމަށް މުއާޒް ވިދާޅުވިއެވެ.

ކަރަންޓު ބޭނުންކުރެވޭ ވަރު ބެލުމަށް ފެނަކައިން ސްމާޓް މީޓަރު ގާއިމްކޮށްފައިވާއިރު، ފެން މީޓަރުތައްވެސް ސްމާޓް މީޓަރުތަކަކަށް ބަދަލުކުރުމަކީ ފެނަކައިގެ އުންމީދެއް ކަމަށް މުއާޒް ވިދާޅުވިއެވެ. މިކަމުގެ ސަބަބުން އާންމު ރައްޔިތުންނަށް ވަރަށް ބޮޑެތި ލުއިފަސޭހަތަކެއް ލިބިގެންދާނެ ކަމަށް ފެނަކައިން ބުނެއެވެ.

ސްމާޓް މީޓަރު ބެހެއްޓުމުގެ މަސައްކަތް އެހެން ރަށްރަށުގައި ބެހެއްޓުމުގެ މަސައްކަތް ކުރިއަށްގެންދަން ވަނީ ނިންމައިފައެވެ. އެގޮތުން ހދ. އަތޮޅާއި ބ. މ. ފ. ތ. އަތޮޅު އަދި ފުވައްމުލަކު ސިޓީގައި ސްމާޓް މީޓަރު ބަހައްޓަން ނިންމާފައިވާ ކަމަށް ފެނަކައިން ބުނެ އެވެ.

ކުޑަހުވަދޫގެ ހުރިހާ ގޭބީސީއެއްގައި ސްމާޓް މީޓަރު މިހާރު ވަނީ ހަރުކޮށް ނިމި، އެޕްލިކޭޝަންވެސް ވަނީ އިފްތިތާޙުކޮށްފައެވެ. މި އެޕްލިކޭޝަން އިފްތިތާހުކޮށްދެއްވީ މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވަޒީރު ތާރިޤް އިބްރާހިމްއެވެ.