ރާއްޖޭގައި ޒަކާތުގެ ނިޒާމު އިތުރަށް ހަރުދަނާ ކުރެވޭނީ އެކަމަށް ޚާއްސަ ގާނޫނެއް ވުޖޫދުވެގެން ކަމުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، ޒަކާތުގެ ކަންކަން ހަރުދަނާކޮށް ކުރިއެރުވުމަށް ގެނެވުނު އެންމެ ބޮޑު އެއް ބަދަލަކީ އިސްލާމީ ކަންތައްތަކާ ބެހޭ ވުޒާރާގެ ދަށުން ހިންގާ ޚާއްޞަ އިދާރާއެއްގެ ގޮތުގައި ހަމަޖެހުންކަމަށެވެ.

އަދި އިސްލާމީ ފިޤުހުގެ އަލީގައި އެ އިދާރާ ކުރިއެރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ އެއްބާރުލެއްވުމަކީ ރާއްޖޭގެ ވެރިއެއްގެ ފަރާތުން މިފަދަ ކަމަކަށް ދެއްވާނެ އެންމެ ފުރިހަމަ އެއްބާރުލެއްވުންކަން ވަޒީރު ފާހަގަކުރެއްވިއެވެ.އިސްލާމީ ކަންތައްތަކާބެހޭ ވަޒީރު ވިދާޅުވީ ކުރިއާއިއަޅާބަލާއިރު ޒަކާތުގެ ނިޒާމަށް ވަރަށް ބޮޑެތި ކުރިއެރުންތަކެއް އައިސްފައިވާކަމަށެވެ. އެގޮތުން ޒަކާތަށް އާންމުގެ ހޭލުންތެރިކަން އިތުރުވަމުން އަންނަކަމަށާއި، މިހާރު އަހަރެެއްގެ ތެރޭގައި ޒަކާތުގެ ގޮތުގައި ލިބޭ ޢަދަދު 100 މިލިޔަނާ ގާތްކުރާކަމަށް ވަޒީރު ވިދާޅުވިއެވެ. އަދި ޒަކާތުގެ ކަންކަން ކުރިއަށްދާނީ އިސްލާމީ ޝާރިޢާއާ އެއްގޮތަށްކަމަށްވެސް ވަޒީރު ވިދާޅުވިއެވެ.ޑރ. ޝަހީމް ވިދާޅުވީ ޒަކާތުގެ ކަންކަން ކުރިއެރުވުމަށް ޤާނޫނޫނީ ގޮތުން ކަންތައްތަކެއް ކުރެވިއްޖެނަމަ އެ ނިޒާމަށް އިތުރު ބަދަލުތަކާއި ކުރިއެރުންތަކެއް އަންނާނެކަމަށެވެ.

މިނިސްޓަރު ވިދާޅުވީ ޒަކާތަށް ލިބޭ ފައިސާގެ އަދަދު އިތުރުވަމުން އަންނަނީ މީހުންގެ ވިސްނުމަށް ވެސް އަންނަ ބަދަލުގެ ސަބަބުން ކަމަށެވެ. އެހެންކަމުން މިހާރު ވެސް އެ ނިޒާމާ މެދު މީހުން ހޭލުންތެރިވާ މިންވަރު އިތުރުވަމުން އަަންނައިރު، ގާނޫނީ އިމުގެ ތެރެއިން ނިޒާމު ހަރުދަނާ ކުރެވިއްޖެ ނަމަ، މިހާރަށް ވުރެެ ބޮޑު ކުރިއެރުމެއް ނިޒާމަށް ލިބޭނެ ކަމުގައި މިނިސްޓަރު ވިދާޅުވިއެވެ.

މި މަހާސިންތާގެ އަމާޒަކީ، ރާއްޖޭގެ އިޖްތިމާއީ އަދި އިގްތިސާދީ މައިދާނަށް ފެތޭ ގޮތަށް، އަވަސް އަދި ފަސޭހަ ގޮތަކަށް ޚިދުމަތްދެވޭ ޒަކާތުގެ އޮނިގަނޑެއް ގާއިމުކޮށް، މި ނިޒާމުގެ ތެރެއިން ދެމެހެއްޓެނިވި ތަރައްގީއަށް މަގުފަހިކޮށްދިނުމެވެ.

މި މަހާސިންތާގެ ސަބަބުން ދެމެހެއްޓެނިވި ގޮތެއްގައި ރާއްޖޭގައި ގާއިމުކުރެވިފައިވާ ޒަކާތުގެ ނިޒާމެއް ކުރިއެރުވުމަށް މަގުފަހިވެގެންދާނެއެވެ.