އެންމެ އުފާވަނީ ޒުވާން ޚަތީބުން ތަމްރީނު ކުރަން ހުޅުވާލި ޕްރޮގްރާމް މުޖުތަމައު ބަލައިގެންފައިވާތީ ކަމަށް އިސްލާމީ ކަންތައްތަކާބެހޭ ވަޒީރު މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ވަޒީރު މިހެން ވިދާޅުވީ، ޒުވާން ޚަޠީބުން ތަމްރީންކުރުމުގެ 2 ވަނަ ބުރުގެ ބައިވެރިންނަށް ސަނަދު ދިނުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ވަޒީރު ވިދާޅުވީ، މި ޕްރޮގުރާމަކީ މުޖުތަމަޢު ބަަލައިގެންފައިވާ މުހިއްމު ޕްރޮގުރާމެއްކަމަށާއި، މި ދައުރުގެ ތެރޭގައި 1000 ޒުވާން ޚަޠީބުން ނެރުމަށް އަމާޒުކޮށްފައިވާކަމަށާއި އެކަން ކާމިޔާބުވާނެކަމުގެ ފުރިހަމަ ޔަޤީންކަން އެބައޮތްކަމަށެވެ.

ޒުވާނުން ޚަޠީބުކަމުގެ ސަނަދު ހާސިލްކުރުމުން ރަށްރަށުން ހޫނު މަރުހަބާ ކިޔާ މަންޒަރާއި، ޢީދު ނަމާދު ފަދަ ބޮޑެތި ޖަމާޢަތްތަކުގައި ނަމާދު ކުރުމުގެ ފުރުސަތު ދެމުންދާ މަންޒަރު ފެންނިލައްވާލަމަށާއި މިއީ މުޖުތަމަޢުއިން މި ޕްރޮގުރާމް ބަލައިގެންފައިވާކަން ހާމަވާކަމެެއް ކަމަށް ވަޒީރު ވިދާޅުވިއެވެ.

ޒުވާން ޚަޠީބުން ތަމްރީންކުރުމުގެ ޕްރޮގުރާމުގެ 2 ބެޗެއް މިހާރު ނިމިފައިވާއިރު 300 އަށްވުރެ ގިނަ ޒުވާނުން ވަނީ ސަނަދު ހާސިލްކޮށްފައެވެ.