ހުޅުމާލެ ފޭސް 2 ގައި އައު މިސްކިތެއް ބިނާކުރުމަށްޓަކައި އިސްލާމީކަންތައްތަކާއި އައުޤާފާ ބެހޭ ވުޒާރާއާއި "ޚިދުމަތް" ޖަމިއްޔާއާ ދެމެދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ ދަށުން ބިނާކުރުމަށް ހަމަޖެހިފައިވަނީ ރާއްޖޭގެ މަޝްހޫރު ދީނީ ޢިލްމުވެރިޔާ ފަޟީލަތުއްޝައިޚް އިބްރާހިމް ފަރީދު އަޙްމަދުގެ ހަނދާނުގައި އިމާރާތްކުރެވޭ މިސްކިތެކެވެ.

Ad by Hajj Corporation

މި މިސްކިތް ބިނާކުރުމުގެ މައިގަނޑު މަގުސަދަކީ ހުޅުމާލެ ފޭސް 2 ގައި އާބާދީ އިތުރުވަމުންދާތީ، އެ ސަރަހައްދުގައި ދިރިއުޅޭ ރައްޔިތުންނަށް ފަސޭހަކަމާއެކު ދީނީ އަޅުކަން ކުރެވޭނެ އިންތިޒާމު ހަމަޖައްސައިދިނުމެވެ. "ޚިދުމަތް" ޖަމިއްޔާގެ ފަރާތުން އިސްނަގައިގެން ކުރިއަށްދާ މި މަޝްރޫޢުގެ ސަބަބުން އެ ސަރަހައްދުގެ މިސްކިތްތަކަށް ދިމާވެފައިވާ ޖާގައިގެ ދަތިކަމަށް ބޮޑު ހައްލެއް ލިބިގެންދާނެއެވެ.

އިސްލާމީކަންތައްތަކާއި އައުޤާފާ ބެހޭ ވުޒާރާއިން ބުނީ، ދީނީ ކަންކަމަށް ހޭލުންތެރިކަން އިތުރުކުރުމަށާއި، އިޖުތިމާއީ ގޮތުން ފައިދާހުރި މިފަދަ މަޝްރޫއުތަކަށް އެ ވުޒާރާގެ ފުރިހަމަ އެއްބާރުލުން އަބަދުވެސް ލިބެމުންދާނެ ކަމަށެވެ.