ޒަކާތުގެ ގޮތުގައި ކުރިން ލިބެމުން އައީ 14 މިލިޔަން ރުފިޔާކަމަށާއި، ނަމަވެސް މިސަރުކާރު އައިސް ޒަކާތަށް ހޭލުންތެރިކަން އިތުރުކުރުމަށް ކުރެވުނު މަސައްކަތުން، މިއަދު އެ ޢަދަދު 100 މިލިޔަން ރުފިޔާއާ ގާތްކުރާކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މިނިސްޓަރ ޑރ ޝަހީމް ވިދާޅުވީ ކުރިއާއިއަޅާބަލާއިރު ޒަކާތުގެ ނިޒާމަށް ވަރަށް ބޮޑެތި ކުރިއެރުންތަކެއް އައިސްފައިވާކަމަށެވެ. އެގޮތުން ޒަކާތަށް އާންމުގެ ހޭލުންތެރިކަން އިތުރުވަމުން އަންނަކަމަށާއި، މިހާރު އަހަރެެއްގެ ތެރޭގައި ޒަކާތުގެ ގޮތުގައި ލިބޭ ޢަދަދު 100 މިލިޔަނާ ގާތްކުރާކަމަށް މިނިސްޓަރ ވިދާޅުވިއެވެ. ޑރ. ޝަހީމް ވިދާޅުވީ ޒަކާތުގެ ކަންކަން ކުރިއެރުވުމަށް ޤާނޫނޫނީ ގޮތުން ކަންތައްތަކެއް ކުރެވިއްޖެނަމަ އެ ނިޒާމަށް އިތުރު ބަދަލުތަކާއި ކުރިއެރުންތަކެއް އަންނާނެކަމަށެވެ.

ޒަކާތުގެ ކަންކަން ހަރުދަނާކޮށް ކުރިއެރުވުމަށް ގެނެވުނު އެންމެ ބޮޑު އެއް ބަދަލަކީ އިސްލާމީ ކަންތައްތަކާ ބެހޭ ވުޒާރާގެ ދަށުން ހިންގާ ޚާއްޞަ އިދާރާއެއްގެ ގޮތުގައި ހަމަޖެހުންކަމަށްވެސް މިނިސްޓަރ ފާހަގަ ކުރެއްވިއެވެ.

އަދި އިސްލާމީ ފިޤުހުގެ އަލީގައި އެ އިދާރާ ކުރިއެރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ އެއްބާރުލެއްވުމަކީ ރާއްޖޭގެ ވެރިއެއްގެ ފަރާތުން މިފަދަ ކަމަކަށް ދެއްވާނެ އެންމެ ފުރިހަމަ އެއްބާރުލެއްވުންކަމަށްވެސް މިނިސްޓަރ ވިދާޅުވިއެވެ.