އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ) ގައި ރާއްޖޭން ބައިވެރިވާން މިިއަދު އޮތް ވަޒީރުންގެ މަޖިލީހުން ނިންމައިފިއެވެ.

އައިއޭއީއޭގައި ބައިވެރިވުމަށް މިއަދު ބޭއްވި ކެބިނެޓުން ނިންމާފައިކަން އިއުލާންކުރެއްވީ މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި، ޚާރިޖީވަޒީރު މޫސާ ޒަމީރުއެވެ.

އެ ބައްދަލުވުމުގައި ވަޒީރު ވިދާޅުވީ މި އޭޖެންސީ އަކީ29 ޖުލައިގެ 1957ވަނަ އަހަރު އުފެދިފައިވާ ޔޫއެންގެ އޭޖެންސީ އެއް ކަމަށެވެ. މި އޭޖެންސީގައި މިހާތަނަށް މިދުނިޔޭގެ 178 ގައުމަކުން ބައިވެރިވެފައި ވާއިރު ހަމަ އެކަނި ބައިވެރި ނުވަނީ ރާއްޖެ އަދި ބޫޓާންކަމަށް ވެސް ޒަމީރު ވިދާޅުވިއެވެ.

"މިއަދު އަޅުގަނޑުމެން ނިންމި އަނެއް ނިންމުމަކީ އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ) ގައި ބައިވެރިވާން. މިއީ 1975 ޖުލައި ގައި އުފެދިފައިވާ ޔޫއެންގެ އޭޖެންސީއެއް. މިހާރު ދުނިޔޭގެ 178 ގައުމަކުން ވަނީ ބައިވެރިވަފެއި އޮތް އޭޖެންސީއެއް. އެކަމަކު ރާއްޖެއިން މިހާހިސާބަށް ބައިވެރިވެފައިނުވޭ. މި ސަރަހައްދުގައި ދިވެހިރާޢްޖެއާއި ބޫޓާނުން ބައިވެރިނުވަނީ. މިހާރު މިކަން އަޅުގަނޑުމެންނަށް މުހިއްމުވެގެން މިއުޅޭ ކަމަކީ، ރައީސްގެ އޭޖެންޑާގައި އެބައޮތް ރާއްޖޭގައި ކެންސާ ހޮސްޕިޓަލެއް ވަރަށް އަވަހަށް އިރާދަކުރެއްވިއްޔާ މިހާރު ކުރެވޭ މަސައްކަތުގެ ތެރެއިން ނިމި ރައްޔިތުންނަށް ޙިދުމަތް ދެވޭނެ އިންތިޒާމެއް ހަމަޖައްސަން."

ވަޒީރު ޒަމީރު ވިދާޅުވީ، ރައީސްގެ އެޖެންޑާގައި އެކަމަށް ވަަރަށް ބޮޑު އިސްކަމެއް ދެއްވާފައިވާކަމަށާއި، އެއީ ރައީސްގެ އޭޖެންޑާގައިވާ ކެންސަރަށް ފަރުވާދޭ ހޮސްޕިޓަލު ގާއިމް ކުރުމަށް ބޭނުންވާ ކަންކަން ފުރިހަމަކުރައްވަން ކަމަށެވެ. އެގޮތުން ޒަމާނީ ބޭހާއި، އެކަމަށް ބޭނުންވާ ފަންނީ އާލަތްތައް ހޯދުމާއި، އެކަމުން އުފެދޭ އުކާލަންޖެހޭ މާއްދާތައް ކަނޑައެޅިފައިވާ އުސޫލުތަކުގެ މަތިން ނައްތާލުމަށް މި އެޖެންސީން އެހީތެރިވާނެ ކަމަށް ވަޒީރު ވިދާޅުވިއެވެ.

އަދި އެކަމަކީ އައިއޭއީއޭގެ މެންޑޭޓުގެ ތެރޭގައި ހިމެނޭ ކަމަކަށްވާތީ މި މަޝްރޫއު ކުރިއަށްގެންދަން ނިންމާފައިވަނީ ސިއްޙީ ވުޒާރާ އާއި ތިމާވެއްޓާއިބެހޭ ވުޒާރާ ގުޅިގެންކަމަށް ވަޒީރު ވިދާޅުވިއެވެ. އަދި އެމަޝްރޫއުގެ އެއްބަސްވުންތައް ނިމުމާއި އެކު ލީޑިންގް އޭޖެންސީއަކަށް ހަމަޖައްސަވާނީ ޑިފެންސް މިނިސްޓްރީ ކަމަށް ކެބިނެޓުން މިއަދުން ނިންމަވާފައިވާކަމަށް ވެސް ޒަމީރު ވިދާޅުވިއެވެ.

މިހާރު ދުނިޔެ މިސްރާބު ޖަހާފައިހުރީ އެޓަމިކް އެނާޖީއާއި ދިމާލަށް ކަމަށާއި އަދި ހައިޑްރޯކާބަން ފަދަ މާއްދާތައް ބޭނުންކުރުން މަދު ކުރަން ފަށާފައިވާ މިދަނޑިވަޅުގައި ރާއްޖެފަދަ ގައުމުތަކުން މިފަދަ ކަންކަމުގައި ބައިވެރިވެގެން މިފަދަކަންކަމުގެ ނަފާ ހާސިލްކުރަންޖެހޭނެ ކަމަށް ވެސް މި ބައްދަލުވުމުގައި ޒަމީރުވަނީ ވިދާޅުވެފައެވެ. ޒަމީރު ވިދާޅުވީ ރައްޔިތުންގެ މަޖިލީހުން ފާސްވުމާއި އެއްކޮށް މި މަޝްރޫއުގެ ދެން ހުރި އަމަލީ މަސައްކަތްތައް ފެށޭނެކަމަށެވެ.