ރާއްޖޭގެ އެތެރޭގެ ކަނޑު ދަތުރުފަތުރުގެ ނިޒާމު ތިމާވެއްޓާ ރައްޓެހި ގޮތަކަށް ބަދަލުކުރުމުގެ ފުރުސަތުތައް ދެނެގަތުމަށް ވޯލްޑް ބޭންކުގެ އެހީގައި ކުރެވުނު ދިރާސާގެ ހޯދުންތައް ހިއްސާކުރުމަށް މިއަދު މަޝްވަރާ ބައްދަލުވުމެއް ބޭއްވިއްޖެއެވެ.

މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ބުނީ މި ބައްދަލުވުމަކީ ރާއްޖޭގެ ކަނޑު ދަތުރުފަތުރުގެ ދާއިރާގައި ހިމެނޭ އެކި ފަރާތްތަކުގެ މެދުގައި މަޝްވަރާކުރުމަށް ބޭއްވުނު ބައްދަލުވުމެއްކަމަށާއި މި ބައްދަލުވުމުގައި ވޯލްޑް ބޭންކުގެ ފަރާތުން ކުރެވުނު ދިރާސާގެ މުހިންމު ހޯދުންތައް ހިއްސާކުރެވުނުކަމަށެވެ.

Ad by Hajj Corporation

ދިރާސާގެ މައިގަނޑު މަޤްޞަދަކީ ރާއްޖޭގެ އެތެރޭގެ ކަނޑު ދަތުރުފަތުރުގެ ނިޒާމުން ތިމާވެއްޓަށް ކުރާ އަސަރު ކުޑަކޮށް، ދެމެހެއްޓެނިވި ގޮތެއްގައި މި ދާއިރާ ތަރައްޤީކުރުމުގެ ފުރުސަތުތައް ދެނެގަތުންކަމަށާއި މި ދިރާސާއިން ލިބުނު މަޢުލޫމާތުގެ އަލީގައި، ކުރިއަށް އޮތް ތަނުގައި ރާއްޖޭގެ ކަނޑު ދަތުރުފަތުރުގެ ނިޒާމު ތިމާވެއްޓާ ރައްޓެހި ގޮތަކަށް ބައްޓަންކުރުމަށް އެޅިދާނެ ފިޔަވަޅުތަކާ މެދު މަޝްވަރާކުރެވުނުކަމަށްވެސް އެ ވުޒާރާއިން މައުލޫމާތުދެއެވެ.

މި ބައްދަލުވުމުގައި ސަރުކާރުގެ ކަމާބެހޭ އިދާރާތަކުގެ އިތުރުން، އަމިއްލަ ވިޔަފާރިތަކާއި، ތިމާވެށި ރައްކާތެރިކުރުމަށް މަސައްކަތްކުރާ ޖަމްޢިއްޔާތަކުގެ ފަރާތްތައް ބައިވެރިވިއެވެ.

މި ދިރާސާގެ ނަތީޖާތަކަށް ބިނާކޮށް، ކުރިއަށް އޮތް ތަނުގައި ރާއްޖޭގެ ކަނޑު ދަތުރުފަތުރުގެ ނިޒާމު އިތުރަށް ހަރުދަނާކޮށް، ތިމާވެއްޓާ ރައްޓެހި ގޮތަކަށް ތަރައްޤީކުރުމަށް ބޭނުންވާ ސިޔާސަތުތަކާއި މަޝްރޫޢުތައް އެކުލަވާލުމަށް މަގުފަހިވެގެންދާނެ ކަމަށް ބެލެވޭކަމަށްވެސް އެ ވުޒާރާއިން ބުނެއެވެ.