ކުޑަކުދިންގެ ހައްގުތަކާއި ރައްކާތެރިކަން ކަށަވަރުކުރުމަށް އަންނަ އަހަރު ހާއްސަ މަސައްކަތްތަކެއް ފައްޓަވާނެކަަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ.

ސީޕީ މިހެން ވިދާޅުވީ ދުނިޔޭގެ ކުޑަކުދިންގެ ދުވަސް ފާހަގަކުރުމުގެ ގޮތުން އިއްޔެ ށ. ފުނަދޫގައި ދިވެހި ފުލުހުންގެ ޚިދުމަތާއި ޔުނިސެފާއި ށ. ފުނަދޫ މުއައްސަސާތައް ގުޅިގެން ބޭއްވި ކުޑަކުދިންގެ ހަވީރުގައި ވާހަކަފުޅު ދައްކަވަމުންނެވެ.

ސީޕީގެ ވާހަކާގައި ގާނޫނުތަކުން ކުޑަކުދިންނަށް ލިބިފައިވާ އެއްވެސް ހައްގަކަށް އަރައިގަންނަ ފަރާތްތަކުގެ މައްސަލަ ބެލުމުގެ ޒިންމާ އޮންނަނީ ދިވެހި ފުލުހުންގެ މުއައްސަސާއަށްކަން ފާހަގަކުރައްވައި، އަދި ކުޑަކުދިންނާމެދު ހިންގޭ އަނިޔާވެރި އަމަލުތައް ރާއްޖޭގައިވެސް ހިނގަމުންދާކަން ވަނީ ފާހަގަކުރައްވާފައެވެ. ސީޕީ ވަނީ މިފަދަ އަމަލުތައް ހިންގާ ފަރާތްތަކާމެދު ގާނޫނީ އިމުގެ ތެރެއިން އެންމެ ހަރުކަށި ފިޔަވަޅު އަޅާނެކަމުގެ ޔަގީންކަން ދެއްވާފައެވެ.

ސީޕީ ޝުޖާއު ވިދާޅުވިގޮތުގައި ދިވެހި ފުލުހުންގެ ޚިދުމަތުގެ މަސައްކަތްތައް އަންނަ އަހަރަށް ތަރުތީބުކުރާއިރު، އެންމެ އިސްކަންދޭ ކަންތައްތަކުގެ ތެރޭގައި ކުޑަކުދިންގެ ރައްކާތެރިކަމަށް އިސްކަންދިނުން ކަނޑައެޅިގެންދާނެއެވެ. މިގޮތުން، ކުޑަކުދިންގެ ހައްގުތަކާއި ރައްކާތެރިކަން ކަށަވަރުކުރުމަށް ހާއްސަ މަސައްކަތްތަކެއް ކުރެވިގެންދާނެ ކަމަށް ސީޖީ ޝުޖާއު ވަނީ ވިދާޅުވެފައެވެ.

ސީޕީގެ ވާހަކާގައި ވަނީ ފަލަސްތީނުގެ ކުޑަކުދިންގެ ހާލަތަށް ވެސް އަލިއަޅުއްވާލައްވާފައެވެ.މިގޮތުން އެ ކުދިން އެތައް ހައްގުތަކަކުން މަހުރޫމުވެ، ތަހައްމަލުކުރަމުންދާ ދަތި އުނދަގޫތަކާއި ބިރުވެރިކަމަކީ މިފަދަ ދުވަހެއް ފާހަގަކުރާއިރު ލިބޭ ހިތްދަތިކަމެއްކަން ފާހަގަކުރެއްވިއެވެ.

"މި ވަގުތުވެސް ފަލަސްތީނުގެ އެތައް ކުދިންނެއް އެ ކުދިންނަށް ލިބިފައިވާ އެތައް ހައްގަކުން މަހުރޫމުވެ، އެ ހައްގުތައް ލިބޭނެ ދުވަހަކާމެދު އިންތިޒާރު ކުރަމުން އެބަދޭ. އެ ހާލަތު ބަދަލުކުރުމަށް އަޅުގަނޑުމެންނަށް ކުރެވޭނެ ކަމަކީ، ވެވެންއޮތް އެހީތެރިކަމެއް ފޯރުކޮށްދިނުމާއި މާތްﷲ ގެ ޙަޟްރަތުގައި ދުޢާ ދެންނެވުން" ސީޕީ ވިދާޅުވިއެވެ.