ރައްޔިތު މީހާ މަގުމައްޗަށް ނުކުމެ ދަތުރު ކުރަން ފަށައި ފަސް މިނިޓް ހޭދަވެގެން ދާއިރު ފުލުހަކު ފެންނަން ޖެހޭނެ ގޮތަށް ދިވެހި ފުލުހުންގެ ހިދުމަތުގައި ޕޮލިސީ ކަނޑައަޅާފައިވާނެ ކަމަށް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.

މިހާރު މާލެ ސަރަހައްދުގައި ކުރަން ފަށާފައިވާ މަސައްކަތްތަކާ ގުޅޭގޮތުން ޝުޖާއު ދެއްވި އިންޓަވިއުއެއްގައި ވިދާޅުވީ، މާލެ ސަރަހައްދުގައި ހިނގާ އެކްސިޑެންޓްތައް އިތުރުވަމުން ދިޔުމާއެކު ފުލުހުންގެ ހިދުމަތުގެ ޕޮލިސީއެއްގެ ގޮތުގައި، ރައްޔިތު މީހާ މަގުމައްޗަށް ނުކުމެ ދަތުރު ކުރަން ފަށައި ފަސް މިނިޓް ހޭދަވެގެން ދާއިރު ފުލުހަކު ފެންނަން ޖެހޭނެ ގޮތަށް ކަނޑައަޅާފައިވާނެ ކަމަށެވެ.

"އެކަން ހާސިލުކުރުމަށް މިހާރު މި މަސައްކަތް ކުރަނި. އެގޮތުން، މިހާރު ޓްރޭނިންގ ހަދަމުންގެންދާ ފުލުހުން ޓްރޭނިންގއަށްފަހު އައުމުން މި މަގްސަދު ހާސިލް ކުރުމަށް އެ ފުލުހުން ފްރަންޓްލައިންގައި ހިދުމަތް ދޭން ފަށާނެ. މިކަން ދުވާލުގެ ބޮޑުބައެއްގައި ހާސިލް ވެގެންދާނެ،". ޝުޖާއު ވިދާޅުވިއެވެ.

"މިހާރުވެސް 360 އެއްހާ ރެކްރޫޓް ފުލުހުން ތަމްރީން ފުރިހަމަ ކުރުމުން އެބަ ގެންދޭ. އެ ފުލުހުން ތަމްރީންކޮށް ހިދުމަތަށް ނެރުމަށް ގެންދަނީ މަސައްކަތް ކުރަމުން. ގިނަ އަދަދެއްގެ ފުލުހުން ތަމްރީން ފުރިހަމަ ކުރުމަށް ހިދުމަތް ފޯރުކޮށްދިނުމާ ދުރުގަ ތިބުމުގެ ސަބަބުން ދިމާވާ ދަތިތައް ހައްލުކޮށް ފްރޮންޓްލައިނަށް ބޭނުންވާ ފުލުހުން އެޑްމިނިސްޓްރޭޓިވް އަދި ސަޕޯޓް ބަހާތަކުން ނަގައިގެން ރައްޔިތުން އެދޭފަދަ ހިދުމަތެއް ފޯރުކޮށްދިނުމަށް މި ގެންދަނީ މަސައްކަތް ކުރަމުން،". ޝުޖާއު ވިދާޅުވިއެވެ.

ޝުޖާއު ވިދާޅުވީ، ސީނިއާ ފުލުހުން ހިމެނޭގޮތަށް، މުޅި ރާއްޖޭގަވެސް ފްރަންޓްލައިންގައި ހަރަކާތްތެރިވާ ފުލުހުން އިތުރުކޮށް ފުލުހުންގެ ޕްރެޒެންސް އިތުރު ކުރުމަކީ މަގްސަދެއް ކަމަށެވެ. މިއީ ފުލުހުންގެ ސީނިއަރ މެނޭޖްމަންޓުން ނިންމާފައިވާ ނިންމުމެއް ކަމަށްވެސް ޝުޖާއު ވަނީ ވިދާޅުވެފައެވެ.

ޝުޖާއު ވިދާޅުވެފައިވާގޮތުގައި، ސްކޫލްތައް ކައިރީ ސީނިއާ ފުލުހުން ހަރަކާތްތެރިވާގޮތަށް ފެށި މަސައްކަތް މިހާރުވެސް ކުރިއަށް ދާނެއެވެ. އޭގެ އިތުރުން، މާލޭގެ ޓްރެފިކް ބާރުބޮޑުވާ ގަޑިތަކުގަ ވަކި ހާއްސަ ސަރަހައްދުތަކެއް ފާހަގަކޮށް ސްޓެޓިކްކޮށް ފުލުހުން ތިބެގެން ބެލެހެއްޓުމުގެ މަސައްކަތްވެސް ކުރަމުންދާ ކަަމަށް ޝުޖާއު ވިދާޅުވިއެވެ.

މި މަސައްކަތަކީ ވަކި ދުވަސްވަރަކަށް ކުރިއަށް ގެންގޮސް ހުއްޓާލާނެ މަސައްކަތެއް ނޫންކަން ފާހަގަކުރައްވަމުން ޝުޖާއު ވިދާޅުވީ، ފުލުހުންގެ ހިދުމަތް ދިނުމުގައި މިއީ މޮޑެލްއެއްގެ ގޮތުގައި ބަލައިގެން ކުރިއަށް އޮތް ތަނުގައި ހިދުމަތް ދެމުން ގެންދާނެ ކަމަށެވެ.

އަދި މަގުތަކުގެ ބާރު ބޮޑުވާ ޕީކް ގަޑިތަކުގަ މާލެއަށް ބެލި ކަމުގައި ވިޔަސް 21 ސަރަހައްދެއްގަ ފުލުހުން ހަރަކާތްތެރިވަމުން ގެންދާނެކަަންވެސް ޝުޖާއު ފާހަގަކުރެއްވިއެވެ.

އޭގެ އިތުރުން ފުލުހުން ވަނީ މި މަސައްކަތްތައް މޮނިޓަރ ކޮށް ވިލަރެސް ކުރުމަށް ޒަމާނީ ކޮމިއުނިކޭޝަން ސެންޓަރެއް މާލެ އަދި ހުޅުމާލޭގައި ގާއިމްކޮށްފައެވެ. އަދި ސީނިއާ ފުލުހަކު މި ސެންޓަރުގަ 24 ގަޑިއިރު ޑިއުޓީ ކުރަމުން ގެންދާނެއެވެ.