ދިވެހި ފުލުހުންގެ ހިދުމަތުގެ ނެޓްވޯކަށް ދިމާވި މައްސަލައެއްގެ ސަބަބުން އޮންލައިން ހިދުމަތްތައް ހުއްޓިއްޖެއެވެ.

ދިވެހި ފުލުހުންގެ ޚިދުމަތުގެ ނެޓްވޯކަށް ދިމާވި ޓެކްނިކަލް މައްސަލައަކާ ގުޅިގެން އިންޓަނެޓް މެދުވެރިކޮށް ދެމުންއައި ޚިދުމަތް ވަގުތީ ގޮތުން މެދުކެނޑިފައިވާކަން ދިވެހި ފުލުހުންގެ ޚިދުމަތުން ވަނީ އިއުލާނު ކޮށްފައެވެ. އަދި މިކަމުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށް ވެސް އެ އިދާރާއިން ވަނީ މާފަށް އެދިފައެވެ.

މި މައްސަލަ ހައްލުކުރުމުގައި ފުލުހުން ހަރަކާތްތެރިވަމުންދާ ކަމަށް އެ އިދާރާއިން ކުރި މީސްމީޑިއާ ޕޯސްޓެއްގައި ހާމަކޮށްފައިވެއެވެ.

ފުލުހުންގެ އިދާރާއިންދޭ އޮންލައިން ޚިދުމަތްތަކުގެ ތެރޭގައި، އިމާޖެންސީ ނޫން ހާލަތްތަކުގައި ޕޯޓަލް މެދުވެރިކޮށް މައްސަލަ ރިޕޯޓްކުރުމާއި، ކުށުގެ ރިކޯޑް ސާފުކުރުން ފަދަ ކަންކަން ހިމެނެއެވެ.