ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓަށް ބަދަލު ގެންނަވަން އުޅޭ ކަމަށް ބުނެ ދައްކަނީ ދޮގު ވާހަކަތަކެއް ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.

ރައީސް އޮފީހުން މިހެން ބުނެފައި ވަނީ ކެބިނެޓަށް ބޮޑެތި ބަދަލުތަކެއް ގެންނަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި ކަމަށް ބުނެ ދެކެވޭ ވާހަކަތަކާއި ގުޅިގެންނެވެ. ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ ކެބިނެޓަށް ބަދަލު ގެންނަން ނިންމާފައިވާ ކަމަށް ބުނެ ފަތުރަމުން ދަނީ ދޮގު ވާހަކަތަކެއް ކަމަށެވެ.

ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައިނުވާ ވާހަކަ ދަންނަވަން. ހީނާ ވިދާޅުވި އެވެ.

އެންމެ ފަހުން ރައީސް ކެބިނެޓަށް ގެންނެވި ބަދަލަކީ މާލީ ވަޒީރުކަމަށް މޫސާ ޒަމީރު އައްޔަން ކުރައްވައި، ސިއްޙަތާބެހޭ ވަޒީރު ކަމަށް ޢަބްދުﷲ ނާޡިމް އައްޔަން ކުރެއްވުން އަދި ހާރިޖީ ވަޒީރަކަށް އަބްދުﷲ ޚަލީލް އައްޔަން ކުރެއްވުމެވެ.

ކެބިނެޓަށް ބަދަލުގެންނަން އުޅޭ ވާހަކަ ފެތުރެނީ ޔޫތު މިނިސްޓަރު އިބްރާހިމް ވަހީދު މަގާމުން ވަކިކުރައްވާ ޔޫތު މިނިސްޓަރު ކަަމަށް ޓޫރިޒަމް މިނިސްޓަރު އިބްރާހިމް ފައިސަލް އައްޔަނު ކުރަން ނިންމާފައިވާ ކަމަށެވެ. އަދި ޓޫރިޒަމް މިނިސްޓަރު ކަމަށް ފިނޭންސް މިނިސްޓަރު މޫސާ ޒަމީރު އައްޔަން ކުރައްވަން ނިންމަވާފައިވާ ކަމަށެވެ.ފިނޭންސް މިނިސްޓަރު ކަމަށް އައްޔަން ކުރައްވަން އުޅެނީ ފިނޭންސް މިނިސްޓްރީގެ އެޑްވައިޒަރަކަށް ހުންނެވި ކުރީގެ ގަވަރުނަރު އަހުމަދު ނަސީރު ކަމަށެވެ.