ވަޒީފާއިން އަލަށް ރިޓަޔާވާ މުވައްޒަފުންނަށް މަހުން މަހަށް ދެމުން އަންނަ އެލަވަންސްއަށް އަންނަ މަހު 1 އިން ފެށިގެން ގެންނަން ނިންމި ބަދަލު ނުގެނައުމަށް ސަރުކާރުން ނިންމަވައިފިއެވެ.

ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާން ހީނާ ވަލީދު ވިދާޅުވީ، އެ ނިންމުން ބަދަލުކޮށްފައިވާ ކަމަށެވެ.

މި ނިންމުން ބަދަލުކުރީ މުވައްޒަފުންގެ ކަންބޮޑުވުންތަކެއް ހުރުމާ އެކު، ކެބިނެޓްގެ އިއްޔެގެ ބައްދަލުވުމަށް ރައީސް ޑރ. މުހައްމަދު މުއިއްޒު އެ މައްސަލަ ހުށަހަޅުއްވައި، ފުޅާ ދާއިރާއެއްގައި މަޝްވަރާ ކުރެއްވުމަށް ފަހު ކަމަށް ހީނާ ވިދާޅުވިއެވެ.

ސަރުކާރުގެ ވަކިވަކި އިދާރާތަކުން ހިންގާ އަމިއްލަ ރިޓަޔަމެންޓް ސްކީމްގެ ތެރެއިން، އަންނަ މަހުގެ 1 އިން ފެށިގެން ވަޒީފާ އިން އަލަށް ރިޓަޔާވާ މުވައްޒަފުންނަށް މަހުން މަހަށް ދޭން ކަނޑައަޅާފައިވާ އެލަވަންސްތައް ނުދޭން ނިންމައި އެކަން ފިނޭންސް މިނިސްޓްރީން އެ އިދާރާތަކަށް އެންގުމުން މިކަމާއި ބައެއް ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.

ސަރުކާރުގެ މުވައްޒަފުންގެތެރެއިން ޑަބަލް ޕެންޝަން ނުވަތަ ދެ ޕެންޝަނުގެ ގޮތުގައި މަހުންމަހަށް ލިބޭ ޢަދަދަށް ބަދަލު ނުގެނައުމަށް ނިންމެވީ އެގޮތަށް އިނާޔަތްލިބޭ ވަރަށް ގިނަ މުވައްޒަފުންތަކެއް ތިބުމާއި ގުޅިގެން، އެހާ ގިނަ ދުވަހު ލިބެމުން އައި އިނާޔަތެއް ކަނޑާލުމަކީ އެފަރާތްތަކުގެ ކަންބޮޑުވުމެއްކަމަށް ޤަބޫލުކުރެވޭތީކަމަށް ފިނޭންސް މިނިސްޓްރީން ވަނީ ކުރިން ބުނެފައެވެ.

މި އުސޫލަށް ބަދަލުގެންނަން ނިންމީ، އަސާސީ ޕެންޝަންގެ ތެރެއިން ލިބޭ ފައިސާގެ އިތުރުން، ވަކިވަކި އިދާރާތަކުން އަމިއްލައަށް ހިންގާ ރިޓަޔަމެންޓް ސްކީމްތަކުން ދޭ ފައިސާގެ އިނާޔަތް އެއްހަމަ ކުރުމުގެ ބޭނުމުގައިކަމަށް ވެސް ފިނޭންސް މިނިސްޓްރީން ވަނީ ބުނެފައެވެ.