ޑޮކްޓަރަށް ދެއްކުމަށްޓަކައި އައިޖީއެމްއެޗްގައި އޮތް ކިއު ކުޑަކުރުމަށްޓަކައި މާލޭގެ 4 ސަރަހައްދެއްގައި ކްލިނިކްތަކެއް ހުޅުވުމަށް ނިންމާފައިވާ ކަމަށާއި، އެ ކްލިނިކްތަކުގެ ޚިދުމަތް އަންނަ އަހަރުގެ ކުރީކޮޅު ލިބޭނެ ކަމަށް އެ ހޮސްޕިޓަލުން ހާމަކޮށްފިއެވެ.

މިކަމާ ގުޅޭގޮތުން މަޢުލޫމާތު ޙިއްސާ ކުރައްވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ޙަލީމް ވިދާޅުވީ، ކްލިނިކްތައް ޤާއިމުކުރާނެ ސަރަހައްދުތަކާއި ބަޖެޓް ހަމަޖެއްސުމާއި ގުޅޭގޮތުން ސަރުކާރުގެ ވުޒާރާތަކާއި މަޝްވަރާ ކުރައްވަމުންދާ ކަމަށާއި، މިހާތަނަށް ކުރެވުނު މަޝްވަރާތަކުގައި، ކްލިނިކްތައް ޤާއިމްކުރުމަށް ކަނޑައަޅާފައިވަނީ މާލެސިޓީގެ ހެންވޭރާއި މާފަންނާއި ގަލޮޅުގައި ކަމަށެވެ.

އަދި ހުޅުމާލެ ފޭސް 1 އަދި 2 ގައި ވެސް ޖީޕީ ކްލިނިކް ޤާއިމުކުރުމަށް މަޝްވަރާ ކުރައްވަމުންދާ ކަމަށް އިބްރާހީމް ޙަލީމް ވިދާޅުވިއެވެ.

މާލޭގެ 4 ސަރަހައްދެއްގައި ޖީޕީ ކްލިނިކް ޤާއިމުކުރުމަށް ސަރުކާރުން މަސައްކަތް ކުރަމުންދާއިރު މިވަގުތު ހުޅުމާލެ ހޮސްޕިޓަލުން ހިންގާ ޖީޕީ ކްލިނިކެއް ހުޅުމާލެ ދެވަނަ ފިޔަވަހި ހިޔާ ޓަވަރު 16ގައި އަންނަނީ ހިންގަމުންނެވެ.

އައިޖީއެމްއެޗްގެ ތަފާސްހިސާބުތައް ދައްކާގޮތުން އިމަޖެންސީއާއި ޖެނެރަލް ޕްރެކްޓިސް ނުވަތަ އާންމު ބަލިތަކަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އަހަރަކު 150،000 އަށްވުރެ މައްޗެވެ. އަދި އޯޕީޑީ ކޮންސަލްޓޭޝާންގެ ހިދުމަތް ހޯދުމަށް މީހުން ޒިޔާރަތްކޮށްފައިވާ އަދަދު އުޅެނީ 240،000 ގައެވެ. އަދި ހުޅުމާލެ ހޮސްޕިޓަލަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އުޅެނީ 238،000 އަށްވުރެ މަތީގައެވެ.