ބޭހަށް ނުގުޑާ ޖަރާސީމުގެ ސަބަބުން ކުރިމަތިވަމުންދާ ނުރައްކާ ދުނިޔޭގެ ހުރިހާ ޤައުމަކަށްވެސް ކުރިމަތިވެފައިވާކަމަށާއި، ދިވެހިންނަށް ރަނގަޅު ޞިއްޙަތެއް ހޯދައިދިނުމަށް ރައީސް ޑރ މުޙައްމަދު މުޢިއްޒު ކުރައްވަމުން ގެންދަވަނީ ނަަމޫނާ މަސައްކަތްޕުޅުތަކެއް ކަމަށް ހެލްތް މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ.

ބޭހަށް ނުގުޑާ ޖަރާސީމުގެ ސަބަބުން ކުރިމަތިވާ ނުރައްކަލުން އަރައިގަތުމަށްޓަކައި މަސައްކަތްކުރުމުގެ ޤައުމީ އެކްޝަން ޕްލޭން އިފްތިތާޙުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނާޒިމް ވިދާޅުވީ، ބޭހަށް ނުގުޑާ ޖަރާސީމުގެ ސަބަބުން ކުރިމަތިވަމުންދާ ނުރައްކާ ދުނިޔޭގެ ހުރިހާ ޤައުމަކަށްވެސް ކުރިމަތިވެފައިވާކަމަށެވެ.

އެހެންކަމުން ދުނިޔޭގެ ސިއްޙަތު ޖަމުޢިއްޔާއިން އެންމެ ބޮޑަށް ބާރުއަޅުއްވަނީ ޤައުމުތަކުގެ އެންމެ މަތީ ލެވެލްގައިވެސް މިމައްސަލައާއި ދެކޮޅަށް އެދެވޭގޮތުގައި މަސައްކަތްކޮށްދެއްވުމަށްކަމަށް ވަޒީރު ވިދާޅުވިއެވެ. އަދި މިކަމުގައި ރާއްޖޭގެ ރައީސުލްޖުމްހޫރިއްޔާ ނަމޫނާ ދައްކަވަމުންގެންދަވާކަން ވަޒީރުވަނީ ފާހަގަކުރައްވާފައެވެ.

މިއެކްޝަން ޕްލޭން އިފްތިތާޙްކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ.

މި ރަސްމިއްޔާތުގައި ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ، އެއް އަމާޒަކަށް ވާޞިލުވުމަށް މިއެކްޝަން ޕްލޭން އެންމެން އެމަގަކުން ދިޔުމުގައި އެހީތެރިވެދޭނެ ކަމަށާއި، ރާއްޖެ ފަދަ ޤައުމަކަށް މިކަމުން އަރައިގަތުމަށް ގުޅިގެން މަސައްކަތް ކުރަންޖެހޭކަމަށެވެ.

ޖަރާސީމުތަކާއި ދެކޮޅަށް ބޭނުންކުރާ އެކިބާވަތުގެ ބޭސްތައް ނަހަމަގޮތުގައި މަސްވެރިކަމާއި ދަނޑުވެރިކަމުގެ ސިނާޢާތުގައި ބޭނުންކުރެވޭނަމަ އޭގެ ނުރައްކާ ރާއްޖޭގެ ކާބޯތަކެތީގެ ރައްކާތެރިކަމަށް ކުރާނެކަމަށާއި އެއީ ޤައުމުގެ ތަރައްޤީއަށް އޮތް ހުރަހެއްކަމަށްވެސް މެޑަމް ސާޖިދާ ވިދާޅުވިއެވެ.