މާލެ އަތޮޅު ދިއްފުށީގައި ދިވެހި ފުލުހުންގެ ޚިދުމަތް ފަށައިފިއެވެ.ސަރުކާރުގެ އަމާޒަކީ 2026 ވަނަ އަހަރުގެ ތެރޭގައި މީހުން ދިރިއުޅޭ ހުރިހާ ރަށެއްގައި ފުލުހުންގެ ޚިދުމަތް ފެށުމެވެ.

މި އަމާޒަށް ވާޞިލްވުމަށް ދެން ފުލުހުންގެ ޚިދުމަތް ޤާއިމްކުރަންޖެހޭނީ 39 ރަށުގައެވެ. މި ސަރުކާރު ވެރިކަމާ ހަވާލުވިފަހުން އަލަށް 24 ރަށެއްގައި ފުލުހުންގެ ޚިދުމަތް ވަނީ ފަށާފައެވެ.

މިހާތަނަށް ރާއްޖޭގެ ޖުމްލަ 148 ރަށުގައި ފުލުހުންގެ ޚިދުމަތް ދަނީ ދެމުންނެވެ.

ދިއްފުށީގައި ޤާއިމްކުރި ޕޮލިސް ޕޯސްޓު ހުޅުވައިދެއްވީ ކޮމިޝަނަރ އޮފް ޕޮލިސް ޢަލީ ޝުޖާޢުއާއި ދިއްފުށި ކައުންސިލު ރައީސް އިބްރާހީމް ސުނިލްއެވެ. ޕޮލިސް ޕޯސްޓުގައި ޤައުމީ ދިދަ ނަންގަވައިދެއްވީ ކައުންސިލު ރައީސް އިބްރާހީމް ސުނިލްއެވެ. ފުލުހުންގެ ދިދަ ނަންގަވައިދެއްވީ ކޮމިޝަނަރ އޮފް ޕޮލިސް ޢަލީ ޝުޖާޢުއެވެ.ދިއްފުށީގައި ފެށި ފުލުހުންގެ ޚިދުމަތާއެކު މާލެ އަތޮޅުގެ ހުރިހާ ރަށެއްގައި މިހާރު ދަނީ ފުލުހުންގެ ޚިދުމަތް ދެމުންނެވެ.