ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް) އުވުމުން ، ވެރިކަމުގައި ހުންނެވި އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިސްތިއުފާ ދޭންޖެހޭނެ އެއްވެސް ނިޒާމެއް ނޯންނާނެކަމަށް ހޯމް މިނިސްޓްރީގެ ސްޓޭޓް މިނިސްޓަރު އަހުމަދު ސިއްދީގް ވިދާޅުވެއްޖެއެވެ.

ސިއްދީގް މިފަދައިން ވިދާޅުވީ މެންދުރު ޓީވީގެ ބޮޑު ސައްލާ ޕްރޮގްރާމުގައި ވާހަކަފުޅު ދައްކަވަމުންނެވެ.

]ޕްރޮގްރާމުގައި ބައިވެރިވެވަޑައިގެން ކެންދޫ ދާއިރާގެ ކުރީގެ މެމްބަރު އަދި ގާނޫނީ ވަކީލް އަލްއުސްތާޒު އަލީ ހުސައިން ވަނީ ރައީސް ވެރިކަމަށް ވަޑައިގަތީ ޕީޕީއެމް/ޕީއެންސީ ހިއްސާވާ ވެރިކަމަކުންކަމަށް ވިދާޅުވެ، މިހާރު ޕީޕީއެމް އުވާލުމުން ރައީސް އަށް ވޯޓުދިން އެޕާޓީގެ ރައްޔިތުންގެ ހައްގު ގެއްލިފައިވާކަމަށް ވިދާޅުވެފައެވެ.

ވުމާއެކު ރައީސް މުއިއްޒު އިސްތިއުފާ ދެއްވަންޖެހޭނެކަމަށް ގަބޫލުކުރައްވާކަމަށް އަލީ ވިދާޅުވިއެވެ.

މި ވާހަކަފުޅުތަކާއެކު ސިއްދީގު އަދި ކުރީގެ މެމްބަރު ނިހާދު ވިދާޅުވެފައިވަނީ 2008 ގެ އިންތިހާބުގައި އެމްޑީޕީން ވާދަކުރީ ކޯލިޝަން ސަރުކާރަކުން ކަމަށާއި ނަމަވެސް ކޯލިޝަން ރޫޅިގެން ދިއުމުންވެސް އިސްތިއުފާދޭން ނުޖެހުނުކަމަށެވެ.

"އެންމެ ފަހުން ބޭއްވި އިންތިހާބުގައި ވާދަކުރެއްވީ ޕީއެންސީގެ ޓިކެޓްގައި. މަޖިލިސް މެމްބަރުންވެސް ވޯޓު ދެއްވީ ޕީއެންސީގެ ޓިކެޓްގައި. އެހެންވީމައި ޕީޕީއެމް އުވާލިއަސް ބެހޭވެސް ކަމެއްނޫން މިއީ ރައީސް އިސްތިއުފާދެއްވުމާ".

ޕީއެންސީއަކީ ވެރިކަން ކުރާ ޕާޓީއަށް ވުމާއެކު އެ ޕާޓީ އަކީ ރާއްޖޭގައި އޮތް އެންމެ ބޮޑު ސިޔާސީ ޕާޓީއަށް ހެދުމަކީ ރައީސް މުއިއްޒު އެދިވަޑައިގަންނަވާ ގޮތެއްކަމަށް ޕާޓީގެ އިސް ބޭފުޅުން ވިދާޅުވެއެވެ. އެއާއެކު މިހާރުވެސް އެޕާޓީން އަންނަނީ މެމްބަރުން އިތުރުކުރުމުގެ ހަރަކާތްތައް މުޅި ރާއްޖޭގައި ހިންގަމުންނެވެ.