ސީރިޔާގެ ރައީސް ބައްޝާރުލްއަސަދު ޤައުމު ދޫކުރައްވާ ވަޑައިގަންނަވަން ޖެހުމުން ހިތާމަކުރަށްވާކަމަށް ކުރީގެ ރައީސް މައުމޫން އަބުދުލްޤައްޔޫމް ވިދާޅުވެއްޖެއެވެ.

ސީރިއާގެ ދާހިލީ ހަނގުރާމައަށް 13 އަހަރަށް ފަހު ބައްޝާރު އާއިލާގެ 54 އަހަރުވީ، ބައަަސް ޕާޓީގެ ވެރިކަން މިހާރު ވެއްޓިފައިވާ ކަމަށް، ސަރުކާރާ ދެކޮޅަށް ހަނގުރާމަކުރަމުން އަންނަ ހަނގުރާމަވެރިންގެ ކޯލިޝަނުން މިއަދު ވަނީ އިއުލާނުކޮށްފައެވެ.

ބައިނަލްއަގްވާމީ މީޑިއާ ބުނާގޮތުން ސީރިޔާގެ ރައީސް ބައްޝާރުލްއަސަދު ޤައުމު ދޫކުރައްވާ ވަނީ ފިއްލަވާފައެވެ. ނަމަވެސް ވަޑައިގަތްތަނެއް އަދި ސާފެއް ނުވެއެވެ.

މިކަމާއިގުޅިގެން ރައީސް މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ، ''ރަޙްމަތްތެރި ސީރިޔާގެރައީސް ބައްޝާރުލްއަސަދު ޤައުމު ދޫކުރައްވައި ވަޑައިގަތުމަށްޖެހިވަޑައިގަތްކަމަށްޓަކައި ހިތާމަކުރަށްވާ'' ކަމަށެވެ.

'' އަޅުގަނޑު އެދެނީ އެކުވެރި ސީރިޔާގެއުޚުއްވަތްތެރި ރައްޔިތުންނަށް ސުލްޙަމަސަލަސްކަމާއި އުފާފާގަތިކަން.'' މައުމޫން ވިދާޅުވެފަވެއެވެ.

ބައްޝާރުގެ ވެރިކަމާ ދެކޮޅަށް ހަނގުރާމަކުރާތާ 13 އަހަރު ފަހުން މީގެ 10 ދުވަސް ކުރިން ހަނގުރާމަވެރިން ހޯދަން ފެށި ކުރިއެރުންތަކާ އެކުގައި އެ ޤައުމުގެ ހާލަތު ވަނީ ބަދަލުވެގެން ގޮސްފައެވެ. އަދި ސީރިއާ ސަރުކާރާ ދެކޮޅަށް ނުކުތް އިސްލާމިކް ހަޔާތު ތަހްރީރު އަލް ޝާމް (އެޗްޓީއެސް) ޖަމާއަތުން ދެ ހަފްތާ ތެރޭ އެތައް ސިޓީއެއް ހިފުމަށް ފަހު ދިމިޝްގަށް އެރީ ސީރިއާގެ ސިފައިންނާއި ކުރިމަތިލާންނުޖެހި، ފަސޭހަކާ އެކުގަ އެވެ.

މި ކުއްލި ބަދަލާ އެކު، ބޮޑުވަޒީރު މުހައްމަދު އަލް ޖަލާލީ ވަނީ ސީރިއާގެ ރައްޔިތުން ހޮވާ ކޮންމެ ލީޑަޝިޕަކަށް އެއްބާރުލުން ދޭން ތައްޔާރަށް ހުންނެވި ކަމަށް އިއުލާނުކުރައްވައިފަ އެވެ.