ބޭނުންވަނީ މަސްވެރިކަމުގައި ސަރުކާރުގައި އޮންނަ ބާރު މަސްވެރިންނަށް ދޫކޮށްލައި، އެ ދާއިރާ ރައްޔިތުންނާ ގާތުން ކުރިއަރުވަން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އއ. އަތޮޅުގެ ރަށްތަކަށް ރައީސް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު ރަސްދޫއަށް ވަޑައިގެން ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، މަސްވެރިކަމުގެ ސިނާއަތަކީ އިގްތިސާދު ފުޅާކުރުމުގައި އެންމެ މުހިންމު އެއް ދާއިރާ ކަމަށާއި، އެ ދާއިރާ ކުރިއެރުވުމަށް ސަރުކާރުން ވަރަށް އިސްކަން ދޭ ކަމަށެވެ.

ރައީސް ވިދާޅުވީ، މަސްވެރިކަން ކުރިއެރުވުމަށްޓަކައި އައިސް ޕްލާންޓްތައް ގާއިމްކުރުމަކީ އެންމެ މުހިންމު އެއްކަން ކަމަށާއި، އެކަން ކުރުމަށް މި އަންނަ އަހަރުގެ ތެރޭގައި ސައުދީ ފަންޑު އަދި އެހެނިހެން ފަންޑުތަކުގެ އެހީގައި އާއި، ދައުލަތުގެ ބަޖެޓުގެ އެތެރެިން ވެސް އިތުރު އައިސް ޕްލާންޓުތައް ގާއިމްކޮށް، ކެޕޭސިޓީ އިތުރުކުރުމަށް މަސައްކަތް ކުރައްވާނެ ކަމަށެވެ.

ރަސްދޫގެ ރައްޔިތުންނާއެކު ކުރެއްވި ބައްދަލުވުމުގައި ރައީސް މުޢިއްޒު އަދި ސަރުކާރުގެ އިސް ބޭފުޅުން -- ފޮޓޯ: ރައީސް އޮފީސް

އޭގެ ތެރެއިން، ދޯނިތަކުގައި އާރްއެސްޑަބްލިއު ސިސްޓަމްތައް ހަރުކުރުމަށް މި އަހަރު ލުއި ލޯނުތައް ތައާރަފްކުރިކަން ފާހަގަކުރައްވަމުން ރައީސް ވިދާޅުވީ، އެ ލޯނުތައް ވެސް ތައާރަފްކުރުމުގެ ބޭނުމަކީ ސަރުކާރުން މަސްވެރިކަމުގައި ގެންގުޅޭ ކޮންޓްރޯލް އަމިއްލަ ފަރާތްތަކަށް ދޫކޮށްލައި، އަމިއްލަ ފަރާތްތަކުން އެ ދާއިރާގައި ކުރިއެރުވުން ކަމަށެވެ.

އާދެ އައިސް އެއީ ވަރަށް މުހިންމު އެއްޗެއް. އައިސް ޕްލާންޓްތައް ރާއްޖޭގެ އެކި ކަންކޮޅުތަކުގައި ގާއިމްކުރުމަކީ އަދި އިތުރު ކުރުމަކީ އަޅުގަނޑުމެންގެ މެނިފެސްޓޯގައި ހިމަނާފައި ހުރި ކަމެއް. އެހެންވީމާ އަޅުގަނޑުމެން މި ބަލަނީ މި އަންނަ އަހަރު ތެރޭގައި، އިރާދަކުރެއްވިއްޔާ މިހާރު އެގޮތަށް މަސައްކަތް ވެސް އެވަނީ ފެށިފައި. އެކި ކަހަލަ ސައުދީ ފަންޑު އަދި އެހެން ގައުމުތަކުގެ މަލްޓިރެޓެރަލް އެޖެންސީތަކުގެ ފަންޑުތަކާއި އެކީގައި އަދި ސަރުކާރުގެ ބަޖެޓުގެ ތެރެއިން، އެކި ރަށްރަށުގެ އައިސް ޕްލާންޓްތައް ގާއިމްކޮށް، ކެޕޭސިޓީ އިތުރުކުރުމާ އެކީގައި އާންމު މަސްވެރިންނަށް، ކެޔޮޅުންނަށް، އޮޑިވެރިންނަށް، އެމީހުންގެ އޮޑީގައި އާރްއެސްޑަބްލިއު ފެސިލިޓީ، އަމިއްލައަށް އައިސް އުފައްދައިގެން މަސް ރައްކާތެރިކަމާއެކީގައި ގެންގުޅެވޭނެ ކެޕޭސިޓީ ގާއިމްކޮށްދިނުން. މިހާރު އެކަމަށް ލޯނުދޭން ފަށައިފައި އެވަނީ، ވަރަށް ގިނަ މަސްވެރިން އެކަމުގެ ފައިދާ އެބަ ހޯއްދަވާ. އަޅުގަނޑުމެން ބޭނުންވަނީ ސަރުކާރުން ހުރިހާ ކަމެއް ނުގެންގުޅެ، ސަރުކާރުން ހުރިހާ ކަމެއްގެ ކޮންޓްރޯލް ނުގެންގުޅެ، އާންމު މަސްވެރިންނަށް، ވިޔަފާރިވެރިންނަށް އެ ފުރުސަތު ދޭން. ސަރުކާރުގައި މި އޮންނަ ކޮންޓްރޯލް، އެ ބާރުން ދޫކޮށްލަން މަސްވެރިންގެ އަތްމައްޗަށް. އެހެންވީމާ ދޯނިތަކުގައި އާރްއެސްޑަބްލިއު ޕްލާންޓް ގާއިމްކުރުމުގެ ފުރުސަތުދޭން ނިންމައިފައިވަނީ. އިރާދަކުރެއްވިއްޔާ މި ރަށުގެ މަސްވެރިންނަށް ވެސް އެ ފުރުސަތު އޮންނާނެ، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް ވިދާޅުވީ، ސަރުކާރުގެ ވިސްނުމަކީ ވެސް، އައިސް ޕްލާންޓްތައް ހިންގުން ރަށްތަކުގެ ކައުންސިލުތަކާ ހަވާލުކުރުން ކަމަށާއި، އެރަށެއްގެ ކައުންސިލެއްގެ ހާލަތުން އެ ޕްލާންޓްތައް ހިންގަން ބޭނުންވާނަމަ އެކަން ކުރުމުގެ ފުރުސަތު އެ ކައުންސިލުތަކަށް އޮންނާނެ ކަމަށް ރައީސް ވިދާޅުވިއެވެ. އެއީ ވެސް، މަސްވެރިކަމުގެ ސިނާއަތް ފުޅާކުރުމުގައި ވީހާ ވެސް ރައްޔިތުންނާ ގާތުން މަސައްކަތްކުރުމުގެ ފުރުސަތު ދިނުމަށް ކަމުގައި ރައީސް ވިދާޅުވިއެވެ.

އަޅުގަނޑުމެން ބޭނުންވަނީ ވީހާ ވެސް ރައްޔިތުންނާ ގާތުން، ވީހާ ވެސް މަސްވެރިންނާ ގާތުން މަސްވެރިކަމުގެ ސިނާއަތް ފުޅާކުރަން. މަސްވެރިކަމަށް ދޭ އިސްކަން އިރާދަކުރެއްވިއްޔާ ރައްޔިތުންނަށް ފެންނާނެ،- ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

އެގޮތުން ރަސްދޫގައި ވެސް އޮތީ 12 ވަރަކަށް ކަންނެލި ދޯނި ކަމުގައި ފާހަގަކުރައްވަމުން ރައީސް ވިދާޅުވީ، އެމަނިކުފާނުގެ އެދުމަކީ އިތުރު އުޅަނދުތައް ބަނދެ، އެ ރަށުގެ މަސްވެރިކަން ވެސް ކުރިއެރުވުން ކަމުގައި ރައީސް ވިދާޅުވިއެވެ.